CHAPITRE GXXV
Comment la royne d'Angleterre arriva à Harfleu, et, de là, s'en alla au Bois de Vicesnes vers le roy et roynne, ses père et mère, où le roy d'Angleterre revint vers elle. Comment lesdis roy s et roynnes tirèrent à Paris et à Senlis. De la femme de Tarmoyer du roy, qui fut exécutée avecques auleuns, ses complices.
En l'an mil iiijc et xxijc, [xxje] [ jour de may, la royne d'Angleterre arriva à Harfleu en noble appareil et grant compaignie de gens d'armes; et, avec elle, le duc de Bethfort, son beau-frère, qui estoit chief de l'armée. Et après que ilz orent prins terre, allèrent à Rouen, et de là au Bois de Vincesnes, devers le roy, son père, et la royne, sa mère. Le roy d'Angleterre, son mary, qui estoit à Meaulx, avecq ses princes, adverty de sa venue, se party et alla au Bois de Vincesnes, devers le roy et la royne, et la roynne, sa femme, où il fut moult honnourablement receu; et, le pénultisme jour de may, les deux roys de France et d'Angleterre
et les deux roynes, se partirent de là et entrèrent à Paris, en moult noble estât, et furent logiés, le roy et la royne en leur hostel de Saint-Pol, et le roy d'Angleterre et sa compaignie furent logiés ou chastel du Louvre; et là célébrèrent, chascun en son hostel, la feste de Pentecouste.
Après les festes passées, le roy d'Angleterre fist en icelle ville de Paris cueillier et lever la taille des marcz d'argent pour forgier la nouvel monnoye, ainsi et par la manière que on l'avoit cueillie ailleurs. Sy s'en esmeurent pluiseurs rumeurs; mais, finablement, les Parisiens pour la crémeur du roy d'Angleterre, ne ozoient monstrer semblant de nulle désobéyssance ou rébellion. Après ung petit de temps, les deux roys et les roynes allèrent à Senlis où ilz séjournèrent aucuns jours. Ne demoura guaires, après, que le roy d'Angleterre envoya le duc de Bethfort, son frère, à Compaiengne, pour icelle recevoir de la main du seigneur de Gamaches ; lequel, comme par avant avoit promis, le rendy en la main du duc de Bethfort ; et se départirent, environ xijc chevaulx.
Eulx ayans bon saulf conduit du roy d'Angleterre, furent menez et convoyez jusques à ce que ilz furent passez oultre la rivière de Saine, et de là s'en allèrent devers le daulphin. Et, en pareil cas, rendi le seigneur de Gamaches les forteresses que ses gens tenoient, comme dessus est faicte mencion. Et par ainsi, toutes les places que tenoient les Daulphinois, de Paris jusques à Boulongne sur la mer, furent mises en l'obéyssance des deux roys de France et d'Angleterre, excepté le Crotoy. Et, en ce mesme temps furent envoyez, de par les deux roys, ambassades au Crotoy devers mes-
sire Jacques de Hareourt; mais, finablement, pour dilligence que ilz sceussent faire, ne peurent venir à quelque traictié, et pour ce s'en retournèrent aroure1.
En ce mesme temps, alla le roy d'Angleterre à Compeigne pour veoir la ville ; auquel lieu luy furent rapportées nouvelles que on avoit voulu prendre la ville de Paris par aucuns moyens de lettres apportées en ladicte ville par la femme de l'armoyeur du roy ; laquelle, par ung certain jour, bien matin, fut aperceue de ung prestre qui estoit allé en ung sien gardin . Et, sur ce, tout effroyé retourna dedens la ville et dist aux gardes qu'ilz advisassent à ce que ilz avoient affaire, et que il avoit veu gens armés, et une femme parler à eulx. Et adont les gardes, de ce advertis, prendrent la femme et le menèrent en prison ; laquelle tantost après congneut son fait. Pour lesquelles nouvelles le roy d'Angleterre retourna, avec toutes ses gens d'armes, à Paris, et fist noyer la femme pour ses démérites, et avec ce aucuns de ses complices; et puis retourna à Senlis devers le roy.
Ouquel temps messire Jehan de Vergy prist la ville de Saint-Digier ; mais les Daulphinois qui estoient dedans se retrayerent ou chastel, ouquel ilz furent tantost asségiez. Et entretant La Hyre et aucuns capitaines s'assemblèrent pour aller secourir ceulx dudit chasteau; de laquelle assemblée furent advertis les deux seigneurs dessusdis; et pour y résister se mirent ensemble en plus grant nombre que ilz pourent finer, et allèrent au devant de leurs adversaires, lesquelz ilz assaillèrent vigoreusement ; et en fin les desconfirent.
