CHAPITRE VII

Parmy ces troubles , il auint que le seigneur comte de Salm fut embarrassé de grandes debtes , et comme il n'auoit de quoy à

satisfaire, contraint par necessité, vendit son chasteau de Morhanges à Frederich le Jeune, duc de Lorraine, pour sept cents liures, monnoie de Metz, nonobstant que ceste maison fut son premier aloz , et par le mesre duc le receut en fief, afin que si quelquefois aucune necessité auenoit au duc, qu'il luy fut rendu sans aucune difficulté ou contradiction. L'euesque de Metz étant aduerty de telle paction , plus que de premier fut esmeu d'indignation contre ledit sieur comte de Salm , et des lors commença à le contraindre plus asprement que de coustume. Dauantage , il auint que ledit comte trouua une fontaine d'eaue salée auprès de Morhanges , à l’edification de laquelle il exposa beaucoup de deniers; et jaçoit qu'il en eut eu deffence de l’euesque, si est ce que la fontaine ne valut rien à faire sel. Mais encor n'étant corrigé par les grandes debtes qu'il auoit faites à bastir telles salines. aspirant à choses pires, ne cessoit à molester l'eglise de Sennons par toutes voyes qu'il pouuoit mieux. Car par le conseil de Regnauld , cy dessus nommé, qui de ce temps étoit son baïllif, feit bastir une forge à forger fer en une montagne scise au territoire de l’eglise de Sennone , auquel lieu l'on y trouue des glaçons que vulgairement on appelle mine de fer. L'abbé voyant ces choses , ne tarda gueres qu'il en aduertit l'euesque de Metz , luy disant que ledit seigneur de Salm usurpoit le territoire de son eglise en la sorte qu'il est cy deuant dit , ce que iamais aucun de ses predecesseurs n’auoit eu fait. L'euesque , bien courroucé, commanda à son preuost, que sans delay, il destruisit le bastiment de question, ce qui fut fait; car ledit preuost ne ruyna seulement ladite forge , mais il emporta quant à soy tous les outils et marteaux qu'ils auoient accommodés en iceHe. Et par ce moyen ledit seigneur n'osa plus entreprendre autres choses auxdites forges du viuant de l'euesque Jacques ; mais il se vengeoit assez à molester l'eglise de Sennone.

Comment le mesme Henry de Salm, pressé d'indigence, vendit deux chasteaux à Jacques , euesque de Metz , sçauoir Pierre Percée et Salm.