CCXXXVIII

Mandement de Henri VI relatif à la levée d'une somme de 1,100 livres tournois sur les habitants du bailliage de Cotentin pour l'achèvement du donjon du lieu et place forte de Gavray et à la commission donnée à Robert Biot , vicomte de Coutances, de faire la recette de la dite somme.

Henry, par la grâce de Dieu royde France et d'Angleterre, à noz amez et feaulx conseilliers les trésoriers et generaulx gouverneurs de noz finances en France et Normandie, salut et dilection. Comme par grande et meure deliberacion ait esté ordonné de par nous la somme de unze cens livres tournois estre assise, cueillie et levée ceste foiz ou bailliage de Costentin pour estre convertie et employée es ouvrages, édifices et perfection du donjon du lieu et place forte de Gavray, au bien de noz seigneurie, pays et subgiez, à quoy est expédient estre diligenment entendu par personne à ce souffisante ; — nous, par l'adviz et deliberacion de nostre très chier et très amé cousin Richard, duc de York, nostre lieutenant gênerai et gouverneur de par nous de noz royaume de France et duchié de Normandie, avons ordonné et commiz, ordonnons et commettons par ces présentes nostre bien amé maistre Robert Byote, nostre viconte de Coustances, à faire la recepte de la dite somme de unze cens livres tournoiz et la despense et distribucion des deniers d'icelle au convertissement des ouvrages, édifices et perfection du donjon dessus dit dont il sera tenu rendre bon et loyal compte pardevant noz amez et feaulx les gens de noz comptes à Rouen... Donné à Rouen soubz nostre seel ordonné en l'absence du grant le dixiesme jour de janvier l'an de grâce mil quatre cens quarante trois, et de nostre règne le vingt deuxiesme. Par le roy, à la relacion de monseigneur le duc

de York, lieutenant gênerai et gouverneur de France et Normandie. J. Drosay.

[Bibl.Nat., Quittances, t. 81, na 4927 )