N. ST.), 28 FÉVRIER, AVRANCHES

Mention de messages envoyés en divers lieux, notamment au Mont-Saint- Michel et à Granville, par Guillaume Chamberlain et Louis Galet, commissaires préposés par Henri VI à la conservation des trêves, pour s'informer de l'arrivée des commissaires du parti français.

Nous Guillaume Chamberlein, chevalier, et Loys Gallet, conseillier et maistre des requestes de l'ostel du roy nostre sire, commissaires generaulx ordonnez pour la conservacion des présentes trieves, certifiions à tous à qui il appartient que Raoul Gourdel, viconte d'Avrenches, a par nostre ordonnance paie, baillié et délivré les sommes qui ensuivent

ainsi et aux personnes et pour les causes cy apriez déclarées, c'est assavoir à Jehan Gaultier, la somme de diz solz tournois pour avoir esté de la ville d'Avrenches au lieu du Mont Saint Michiel pour ce qu'il congnoissoit mieulx le seigneur du dit lieu et les gens pour enquerre de leur estât et de la venue des commissaires du party contraire que ne faisoit ung poursuivant que y avions envoyé, nous estans au Pontaudemer. Item, à Robin Penuchon et à Colin Leparmentier, la somme de trente six solz, pour avoir esté, c'est assavoir le dit Penuchon à Grantville porter lettres de la significacion de nostre venue pardeça et apporter la responce des dites lettres pour savoir se les commissaires du dit party adverssaire [y estoient], vingt quatre solz, et au dit Leparmentier pour avoir de rechief esté au Mont Saint Michiel afin de signifier nostre dite venue et moustrer le debvoir en quoy le roy nostre sire se voulloit mettre, douze solz, qui font la dite somme de trente six solz. Au dit Penuchon, pour avoir esté à Dampfront porter lettres au viconte du dit lieu et à son lieutenant pour faire venir gens de chascune des parroisses de la viconté et du pays d'environ jusques à Vire pardevers nous le lendemain du premier jour de mars, pour soy informer des provisions et autres exactions prinses es dites parroisses par Olivier Abatirsby et autres gens de guerre du dit Dampfront, ainsi que mandé nous estoit le faire par par lettres du roy nostre dit seigneur, par marchié fait avec lui, la somme de vingt quatre solz. Item, au dit Gaultier, pour estre alei à Saint Jame de Bevron porter certain nostre mandement adressé aux officiers du roy nostre dit seigneur ilec estans contenant qu'on prenist et aprehendast les corps d'aucuns du Mont Saint Michiel qui, par subtilz moyens avoient emprisonné et contraint à paier amendes aucuns des subgez du roy pour ce qu'ilz avoient sorty jurisdicion devant les juges d'icelui seigneur et icelui nostre mandement faire publier es lieux acoustumez faire crix, la somme de dix solz tournois. Tesmoing noz seingz manuelz cy mis le derrain jour de février l'an mil quatre cens quarante six. Chamberlein. Galet.

{Bibl. Nat., Quittances, t. 85, n°5 68i.)