Manque A, B
Flandres et leur charga moult grant gent. Quant Charles vint en Flandres, tout le pais se rendi à lui moult ligierement jusques à Gant. Là estoit le conte et ses enfans, qui avoient mandez leurs aliez, mais si pou de gent leur vint en aide, que ilz virent bien que ilz ne pourroient contrester contre le povoir Charles. Adonc se rendi le conte et Robert son ainsné filz et Guillaume, par condicion que, se ilz ne povoient dedens un an accorder au roy, Charles de Valois les devoit restablir où il les avoit prins. Adonc s'en ala la contesse et ses quatre filz à Namur, dont elle estoit dame, et Charles emmena le conte et ses deux filz et pluseurs chevaliers de Flandres en la main du roy, et y mist Charles de Valois Raoul de Neesle, connestable de France, et en fut gouverneur. Charles de Valois mena ses prisonniers au roy et bien lui dist par quelle condicion ilz s'estoient renduz. Le roy envoya le conte Guy en prison en la tour à Compiengne et de ses chevaliers avec lui, et si envoya Robert au chastel de Chinon en Touraine, et envoya Guillaume au chastel de la Nonnette en Auvergne. En cel an ne peurent trouver paix ne accort au roy, dont requistrent à Charles que il les renvoiast en Flandres, ainsi comme il les avoit en convenant. Et Charles requist au roy que il lui rendist les barons, et il dist que non. Adonc Charles assembla cinq mille hommes et parti de France pour aler en Constentinoble , dont sa femme devoit estre empereris.
En ce temps estoit le conte Robert d'Artois au siège devant la Riolle, et tant donna au chastellain, que on appelle Gobertde l'Espinace, et avec ce lui promist un chastel en Flandres, lequel que il vouldroit demander
au roy, et lui rendi la Riolle et Saint Maquare et autres forteresses, que il a voit en garde, dont revint Robert d'Artois au roy à Paris, et lui compta comment Gobert de l'Espinace lui avoit vendu les chasteaulz et les dons que il lui avoit faiz et promis, et le roy lui octroya.
Assez tost après ala le roy en Flandres visiter le pais; là fut bien receuz et festoiez. Et là Gobert de l'Espinace demanda au roy le chastel de Marie de lez Bruges, et le roy lui donna. Adonc fist le roy Jaques de Saint Pol gouverneur de Flandres, et Raoul de Neelle en fut demiz. Le roy s'en ala en France, et assez tost après fut fait le mariage du roy Audouart^ d'Angleterre et de Jebanne, seur au beau roy Philippe, Adonc fut pais par tout le royaume de France, et demoura Flandres au roy par l'espace de deux ans paisiblement.
En ce temps fist Jaques de Saint Pol refaire et enforcier le chastel de Lille pour le roy et autres chasteaux du pays, et fist la commune gent taillier pour payer ces fraiz, dont ilz commencèrent à murmurer. Adonc advint que Gobert de l'Espinace vendi vin à Marie, et les gens de Bruges y alerent boire par pluseurs foiz. Si avint que un bourgois-, que on appelloit Jehan Bredelle, se courouça au varlet qui traioit le vin et li feri, si que il l'occist. Adonc s'arma Gobert et sa gent pour son varlet venger, mais ceulz de Bruges se deffendirent. Le fait fut sceu à Bruges. Adonc y ala bien cinq cens de communes, qui occistrent Gobert et
