CHAPITRE XXX

Comment les Vénitiens s'envoyèrent excuser envers le Roy de ce que ils avoyent faict.

Apres ces choses , les Vénitiens qui doublèrent la malegrace du roy de France, et des princes françois, pour l'achoison de ce qu'ils avoient faict, et dont les François avoient tenus prisonniers, pour eulx excuser envoyèrent leurs ambassadeurs devers le Roy, qui portaient lettres de la seigneurie de Venise avec leur créance. Par ces lettres et ambassadeurs se envoyoient

moult excuser de ce faict, disans : que le mareschal leur avoit faict trop grand tort et dommaige à Barut , et pris leurs biens et marchandises. Et avec ce, quand ils s'en venoient vers luy pour luy dire et remonstrer aimablement , et prier que restitution leur feist de leurs biens, que il leur courut sus, et premier les assaillit. Et eulx comme contraints se meirent en défense : pour laquelle chose Dieu leur avoit donné la victoire , si comme il apparust. Et pource ne leur debvoit sçavoir le Roy, ny nosseigneurs, nul mauvais gré. Telles choses et assez d'autres mensongères pour leur excuse dirent au Roy et a nosseigneurs : mais n'en feurent pourtant creus, ne grand foy on n'y adjousta. Et ainsi s'en allèrent à petite chère, et à froide responce.

Le mareschal qui par ses amis de par deçà entendit ceste nouvelle, lesquels luy avoyent envoyé la coppic des lettres que on avoit apportées au Roy, en feut tant fasché que plus ne se peut, et lors luy sembla bien avoir achoison de mouvoir noise et débat comme il desiroit aux Vénitiens. Et pour celle cause , et pour monstrer leur tort et mensonge, leur escrivit les lettres qui cy après s'ensuivent, ausquels les Vénitiens n'osèrent oncques faire response. Et vrayement comme en armes il demonstroit sa vaillance, et au gouvernement sa prudence, pareillement en escriture apparoissoit son sçavoir au contenu d'icelles, lesquelles par luy sans autre feurent dictées, si bien, et en si bel et notable style, comme on peut veoir, et comme nul clerc rhetoricien pourroit faire , selon le langaige plain et bien ordonné de quoy on doibt user au devis du faict d'armes. Si pouvons conclure par ce qu'il

nous appert, iceluy mareschal estre es grâces comprises en sens et faicts vaillans tout remply.