Probablement Viu, sur les bords de la Sture

ensemble à Saincthia et Sainct Germain; puis nous acheminasmes devant Yvrée, où ne fismes rien, pource que ne feust possible de rompre la chaussée de l'eaue. Que si elle se feust peue rompre, nous estions dedens, de tant que par ce cousté-là il n'y a forteresse aultre que la rivière. Et fusmes constrainctz d'aller assiéger Sainct Martin, lequel nous primes par compozition, ayant enduré deux ou trois cens coups de canon, et aultres places es environs de là. Pendant le siège d'Yvrée, monsieur de Boutières eut advis que monsieur d'Anguien vennoict pour commander en son lieu. Le Roy estoict mal content de luy de ce qu'il avoict avec tant de loisir laissé fortifier Carignan, avec d'aultres occasions particulières. Il fault cheminer bien droict pour contenter tout le monde. Ledict sieur de Boutières en feust fort fasclié : et disoict-on que par despit il avoict quitté Yvrée, laquelle à la longue il eust prins, mais je ne le croy pas. Ainsi que nous en retournions vers Chevas* monsieur d'Anguien arriva, amennant pour renfort sept compaignies de Suisses, qu'ung colonel nommé le Baron commandoict. Et croy que ce feust ast'eure-là que monsieur des Gros vint avec sept ou huit enseignes de Provençeaux ou Ytaliens. Monsieur de Boutières" s'en alla en sa maison en Dauphiné. Il y a bien des affaires en ce monde, et ceux qui ont de grandes charges ne sont pas sans