LE MARQUIS DE SEIGNELAY A DE BASVILLE

A Versailles, le 23 février 1688.

On a arresté à Paris le nommé Boileau de la ville d’Usez et la

nommée Catherine Pujolas, fille d’un advocat de laditte ville, nouveaux catholiques, sur le soupçon qu’on a eu qu’ils vouloient sortir du royaume; et dans la suitte on a apris que cette fille, qui vivoit avec ledit Boileau comme sa femme, est grosse de sept mois, que ses parens en sont fort en peine, et qu’ils en ont fait faire de grandes perquisitions, tant dans le royaume que dans les païs estrangers. Sur quoy le roy m’ordonne de vous escrire afin que vous en adverlissiez leurs parens, et que par un mariage de ces deux personnes d’une condition esgale et d’un aage convenable, ils puissent faire cesser leur désordre.

Le 10 janvier 1690.

Sur l’advis qu’on a eu qu’il estoit arrivé quelques ministres de la R. P. R. à Paris, on en a fait arrester un qui s’appelle de Salve ou de Selve, autrement Valsec, de la ville de Nismes, et l’autre, qu’on n’a pas encore arresté, s’appelle Valsac, autrement Molan et Lestang, de la ville d’Usez. Le roy m’ordonne de vous escrire de vous informer secrètement de la famille et de la conduitte de ces deux hommes, et de me faire sçavoir ce que vous en apprendrez. Vous jugez bien de quelle conséquence il est de tenir la chose secrette, puisque Valsac n’estant pas encore arresté , il pourroit estre adverty des perquisitions que vous ferez.

Reg. secr.