II
debvoir de très-humble service, vous suppliant, monseigneur, croire que, là où Vostre Altèze voudra m'honnorer de ses commandemens, elle m'y trouvera aultant fidèle et affectionné que serviteur qu'elle puisse avoir.
Mais, certes , le contentement que jay receu est que l'obligation en laquelle Vostre Altèze m'a mis, au regard du poinct auquel il luy a pieu me déclarer que son intention est de se conduire en ceste charge tout aultrement que n'ont faict les aultres gouverneurs qui ont esté devant icelle, et ne se proposer aultre but que la pacification et quiétude du povre peuple de ce pays, a esté encore de tant plus grande et plus parfaicle, que plus sans comparaison je respecte, comme de tout temps j'ay respecté, le bien, repos et seureté publicq, que non pas le mien propre, aiant, au pris d'iceluy, tousjours mis dessoubz les pieds mon regard particulier, ainsi que suis encore résolu de faire, tant que la vie me demeurera.
Cela me faict supplier très-humblement à Vostre Altèze qu'il luy plaise constamment et sincèrement maintenir ce seul et unique but en toutes ses actions, et croire qu'en tel cas nonseulement m'efforceray de tout mon pouvoir à m'acquitter du deu de mes obligations , mais mesmes ne voudray jamais espargner ny ma vie propre, ny tout ce qui est en ma petite puissance, pour, selon mes facultez, seconder et servir Vostre Altèze en une œuvre si saincte et louable, comme celuy qui dès pièea me suis du tout dédié et voué au service de Sa Majesté et au salut de ma patrie. Mesmes, Vostre Altèze se pourra asseurer que ceulx de ces pays d'Hollande etZélande rendront à Sa Majesté et à Vostre Altèze toute deue et légitime obéissance, comme, de ma part, je ferai aussi, avec telle fidélité et promptitude (jue bons vassaulx et subjcctz sont obligez de faire.
Mais, monseigneur, après avoir le tout bien meurement considéré, et, au plus près qu'il m'a été possible, examiné ce
que, de la part de Vostre Altèze, mondict S"" le ducq d'Arscliot et ses eollègues m'ont proposé, je trouve que, tout ainsi comme le traiclé de pacification faict en la ville de Gand a esté l'unicque entrée et commencement à délivrer ce povre peuple affligé de tant d'oppressions, ainsi le seul et unique moien pour parvenir au comble du repos et tranquillité tant désirée, consiste en la sincère et réelle manutention et entier accomplissement de tous les poincts contenus en icelle.
Voilà pourquoy, monseigneur, je veulx bien supplier à Vostre Altèze très-humblement de démontrer en cela, par cffect, l'entier bénéfice et contentement qu'iceile m'asseure, par sesdictes lettres, estre délibérée de vouloir donner à ces pays, veu que les yeux d'un chascun sont dressez à ceste mire de la rondeur et sincérité de laquelle on procédera à l'effectuation dudict traicté de Gand, pour d'icelle faire jugement de ce que Ton pourra espérer en ce qui reste encor pour l'entière perfection du repos et tranquillité publicque. Or, aiant sur ce propos plus amplement discouru avec ledict S"^ ducq et messieurs ses collègues, pour ne fascher Vostre Altèze de plus long discours, me remectray du surplus à ce qu'ilz en diront à Vostre Altèze, et, finissant cesle par mes très-humbles recommandations à voz bonnes grâces, prierai Dieu vous donner, monseigneur, en parfaicte santé bonne vie et longue. De Ste.-Gheertrudenberghe, le xxiiij'' jour de may \ 577.
De Vostre Altèze très-humble serviteur,
GuiILe de Nassau.
Siiscripiion : A Son Altèze,
Archives des Affaires étrangères, à Paris ; MS. intitulé Pays-Bas, 1569-1583, fol. 240 (').
(') J'ai trouvé, aux arcllives de Simancas, Pcqwles de Estado, liasse 572, une traduction espagnole de cette lettre.
DCXIII.
LE PRINCE D'ORANGE AUX ÉTATS GÉNÉRAUX (•)
Il insiste sur l'accomplissement de la pacification de Gand. — Il justifie sa conduite et celle des états de Hollande envers la ville d'Amsterdam.
Harlem, 20 juin \W17.
Messieurs , il n'y a celuy d'entre vous lequel ne voie et confesse que la pacification faicte à Gand le viij° de novembre n'ait esté l'unicque et souverain remède à une infinité de maulx et calamitez èsquelles nostre povre patrie se trouve réduicte, et n'ait, quant et quant, destourné le joug insupportable de la tyrannie estrangière, de laquelle l'on nous vouloit oppresser, ensemble et toutte nostre postérité à jamais.
A quoy, de quelle intégrité et rondeur, et avec quelz travaulx et dangiers, je me soye emploie, y aiant libéralement bazardé tous mes amis, frères, biens, possessions, renommée et la vie propre, est aussy notoire à un chascun, comme pareillement la promptitude, bonne foy et constance de laquelle les estalz de ces pays- d'Hollande et Zélande se sont employez en ceste cause, aiant, de leurs propres corps, vies et moiens, basty le pont par lequel on est parvenu à un bien si singulier et soubaitable, est tellement cogneue à un chascun, que j'estimeroys chose superflue d'en faire icy quelque discours.
Et néantmoins, comme, au moien des ruses et practiques
(') PiETER Bon a donné une traduction en hollandais de cette lettre, NederlaniUsche Oorlogen, liv. X, fol. 2S5 v» ; mais il m'a paru qu'une pièce aussi importante devait être connue dans son texte original.
sinistres d'aulcuns, lesquelz, se trouvans peu affectionnez à la patrie, et ne prctendans que de monter au comble des eslîitz et honneurs, par les ruines d'icelle, soubz umbre d'aullres couvertures , taschent à ramener les premières dissentions et guerres civiles, ces bénéfices que avons receuz de la main et faveur singulière de Dieu , polroient bientost estre mis en oubly.
Il est ainsy que, pour le debvoir que j'ay à la patrie , et l'affection que tousjours j'ay portée et porte encores à voslre service, je ne puis obmettre de vous prier bien affectueusement et enhorter à bon escient, comme je prie et enhorte par cestes, que, si tout le reste vient, ou par oubliance à estre mis en nonchaloir, ou, par l'esblouissanl lustre de quelques couleurs et umbres empruntées, à estre reculé de vostre veue et souvenance, au moins il vous plaise continuellement vous représenter devant les yeulx le bien que toutte la patrie a receu de ladicte pacification, afin que vous cntendiés ainsy, comme il est à la vérité, que, comme l'entrée de l'espérance qu'un cliascun a conceu de veoir ce pais restably en son ancien repos, fleur et prospérité, a commencé par icelle, ainsy n'y a nul moien au monde de mener ce bon et lieureulx commencement à une issue désirée, sinon par l'entier et réel accomplissement et parfaiclc observation des poinctz y conteimz et capitulez.
Cela est cause que je vous prie, messieurs, que, mettant cecy en telle considération comme Timportance d'un tel faict mérite, vous vueilliés une fois tenir la main, à bon escient, à ce que ladicte pacification tant salutaire à tout le pais, et laquelle vous avés sy solemnellement jurée et tant de fois ratifiée, puisse à la parfin estre parfaictement accomplie : car, jusques à présent, il semble que nous en tenions plustost une umbre et imaige en apparence, que non pas la vérité et le corps. Quy faict qu'en général nous nous trouvons privez du
principal fruict d'icelle, assçavoir d'une ferme eonjonclion et sincère amitié, avec asscurée confiance des ungs envers les aultres , veu qu'encores , pour l'heure du présent , ainsy que nous avons plus amplement remonstré à mess" de Grobbendonck et docteur Leoninus, voz députez, l'on ne voit encores ny les biens estre restituez, ny les gouvernemens réunis, ny les estrangicrs qui s'estoient déclarez les plus grans ennemis de la patrie, et avoient pillé et saccagé les biens et facultez des habitans, on estre retirez, ny les prisonniers mis en liberté, ny les exilez admis à demeurer en leur patrie, ny les privilèges anciens restituez, ny les attentatz faictz au contraire d'iceulx, abroguez. Mesmes, il semble que derechief l'on dresse practicques et menées pour petit à petit fouller l'authorité des estalz, et remettre en crédit les estrangiers, eulx qui ont esté la cause et source de la ruine publicque j voires qu'on lasche de remettre en vigueur les placcarts sur le faict de la religion, en redressant les escbafl'aulx , pour tyranniser les consciences des povres habitans, et par ainsy faire repulluler pernicieuses semences de dissenlions qui nous ont amené toutes les calamités, misères et désolations du passé. Lesquelles choses, messieurs , ainsy que pouvés bien aisément juger, selon la prudence dont Dieu vous a doué, ne peuvent, sinon accroistre les deffiances, et engendrer grandes altérations d'une part et d'aullre , ilont est fort à craindre que sy, par le réel accomplissement de ladicte paciiication, vous n'y mettes ordre, nous polrions bien tomber en pires termes que n'avons estéoncques auparavant: oultre ce que, par cemoien, vous perdrés, envers tous peuples, provinces et nations estrangières, la réputation et louange que desjà vous avés acquise par un acte sy héroïcque et magnanime, d'aultant qu'ungchascun, voiant qu'après avoir sy bien commencé, vous laissez imparfaicte une chose en laquelle gist tout vostre bien , salut et liberté, et ouvrez la porte à cculx quy par cy-après vouldroient prendre la ven-
geance de vous telle quilz désirent , et quant et quant vous réduire, ensemble et toutte vostre postérité, dessoubz un joug de servitude beaucoup plus intollérable que n'a esté celle du passé, ne poulront juger aultrement, sinon que ce qu'a esté par vous faict jusques ores soit plustost procédé de quelque passion et impatience mal fondée, que de conseil arresté et de constante magnanimité et vertueuse résolution fondée en justice et équité. Au moien de quoy, ung chascun tournera la faveur et bienvueillance que l'on vous a porté jusques à maintenant, en une haine et mocquerie : ce que vous povés éviter, en procurant le parfaiet et réel accomplissement de tous les poincls de ladicte pacification, ainsy que derechief je vous prie bien affectueusement, et enhorte fort sérieusement de vouloir faire, et m'en mander vostre bon advis.
Au reste, je ne puis aussy obmettre de vous dire que nous avons esté advertyz que aulcuns de noz malvueillans auroient semé le bruict comme sy nous menions icy la guerre contre ceulx d'Amsterdam, ou que leur usassions de manière d'hostilité, chose quy ne se trouvera jamais à la vérité, mais, au contraire, nous les admettons par deçà librement et franchement, ne plus ne moins que les aultres habitans de Hollande, combien que, quand les nostres viennent en leur ville, ilz leur font poser les armes, et leur usons de toutte honnesteté et courtoisie possible : mesmes, au traicté de la satisfaction, leur avons accordé tout ce qu'ilz ont peu demander , moiennant seulement qu'ilz se rengeassent en union avec ceulx de Hollande, comme ilz sont accoustumez, es charges et impositions générales , et se déportassent de toultes procédures et manières d'hostilitez, veu que, suivant la pacification faicte à Gand , ilz sont tenuz de ce faire , et que ceste union est le seul fondement et fin principalle pour laquelle l'article de la satisfaction a esté inséré en ladicte pacification , sans laquelle la paix ne peult en elfect consister. Et toutcsfois, se monstrans rétil'z à
choses sy équitables , ilz donnent assez à cognoistre qu'ilz n'ont pas grande envie de maintenir la paix et le repos du pais, ainsy que mesdicts sieurs de Grobbendonek et Leoninus, et mesmes les aultres seigneurs cnvoiez de par Son Altèze, ont peu vcoir et cognoistre. Dontj'ay bien voulu vous advertir, affîn que puissiés en jugier à la vérité, et donner ordre à ce que la paix générale puisse estre maintenue , ainsy que pour le bien et repos du pais il appartient.
Quy est l'endroict où , après m'avoir très-affectueusement recommandé à voz bonnes grâces , je prie Dieu vous donner messieurs, en santé bonne vie et longue. De la ville de Haerlem, ce xx° de juing 1S77.
Vostre très-affectioné amy et patriot à vous faire service,
GuiîXe de Nassau.
Suscription : A messieurs messieurs les députez des estatz généraulx des Pays-Bas, assemblez à Bruxelles.
Copies du temps, aux archives des états de HainauC, & Mons : rcg. Actes des états, de 1516 à 1577, fol. 210, et à la Bibliothèque de la Chambre des Représentants : Recueil de pièces relatives aux états généraux, 1576-1580, t. I, fol. 378.
DCXIV.
