LIX. De la Cort as segneurs

1. Chascuns sires oit ses plez e son larron e sa segnorie en sa terre, esceptez les plez qui apartienent au duc, de qoi nos deimes devant. De que il avint que Bertrans de Verdun prist par achoison de larrecin Pierre de Foliotée, e le tint a Yvri em prison; e Rogier[s] de S. Andriu le volt avoir comme son home e jugier par sa cort. Bertrans ne le volt randre; einz dist que se Rogiers l'eust avant pris, il en eust la justice , mes por ce que i[l] l'avoit receté en sa terre e la jostice le duc l'avoit pris, il em feroit la justice. Rogiers noia contre ce que onques a son esciant n'avoit receté lar[r]on en sa terre, e por ce que Rogiers ne pot estre convaincuz del recetement, il ot sa cort de cel home.

LIX^''. De Forfez de bois.

1. Il ne loise pas as segneurs de terre a mètre les homes qui ont costume en leur forest em prison por aucun forfet de la forest, se il ne sont trové ociant bestes; einz leur soient lor gage randu par pièges e jorz as[s]is de fere droit.

2. E se plez est meuz de la costume e cil qui est retez dit : Je fui pris en ma costume, li lieus doit estre veuz e si doit l'en enquerre si fu pris en sa costume ou el forfet de la forest; e ce que il avra cospéne sera remué del leu devant que jugemenz ait esté fez de la costume ou del forfet de la forest.