Au Roy

Madrid, 31 mai 1571.

Sire, La depesche qu'il a pieu à Votre Majesté me faire du viij°" d'avril me fust seuUement donnée le dernier d'icelluy; et celle du deuxiesme de may, je l'ay heue le xvj"' par ung chevaucheur de votre escuyrie. Lad. lettre d'avril à la réception de ceste autre estoit entre les mains du Rov, votre frère, à Aranxois,

où je la luy avois envoyée; car elle ne contient choze qu'il n'ait peu veoir. Et touchant, Sire, cested. lettre de may, je fuz dire au cardinal de Siguence qu'il m'estoit commandé de voz partz d'aller vers le Roy Catholique tant pour la congratulation de la groisse de ceste Royne que pour autres fins. Il me conseilla n'y avoir lieu que j'allasse pour cela aud. Aranxois ; car le Roy, sond. maistre, estoit acablé de négoces en ce partement des deux Princes de Bohême et de don Jehan d'Austrie, et qu'il scavoit bien que je luy ferois grand plaisir de remectre ceste vizite et office à son retour, m'asseurant sur ses ordres de prebtrise et sur toutz les seremenz que ung chrestien peult faire, qu'il n'y a lieu de craindre ny soubsçonner que les forces qui s'assemblent en Rallie soient contre Votre Majesté. Aussi se tient tant asseuré ced. S' Roy de voz sainctes et bonnes intentions que, si tout le monde l'informoit que vous, Sire, eussiez volunté de luy faire guerre, Sa Majesté Catholique n'en croyroit rien, et aultant en doibt Votre Majesté croire de luy. Et me feist led. s'^ cardinal là dessus aucunes obtestations de l'affection qu'il vous porte et qu'en toutes les messes qu'il chante il faict expresse et dévote prière à Dieu pour Votre Majesté. A cause donc. Sire, du conseil dud. cardinal, j'envoys mon secrétaire vers led. S' Roy l'advertir du contenu de volred. dernière depesche. La responce m'en veint faire le secrétaire Cayes es mesmes parolles couchées par le mémoire que j'ay baillé au s' de l'Aubespine; dans lequel va tout ce que je scaurois respondre aux lettres, Sire, qu'il vous a pieu m'escrire ces deux ou trois mois. Parquoy afin de n'uzer de redicte, je n'en feray nouvelle mention par ceste cy sinon qu'il m'est advis. Sire, que quelque bonne mine que les Espagnolz facent, qu'ilz craignent que leur veuillez empescher leurs dessains. Et ne scay s'il est bon pour votre service et pour le bien de votre coronne de permectre qu'ilz les exécutent ainsi à leur aize, leur laissant fonder et installer ung nouveau royaume en Barbarie pour n'avoir après à rien doubter des empeschementz qu'ilz pourroient avoir des païs loingtains, ains qu'il leur soit lors facille de commectre leurs forces à rencontre de Votre Majesté; laquelle, au jugement des clervoyantz, a le chemin ouvert pour se faire plus grand que ses ancestres n'ont esté depuis Charlemaine, si vous. Sire, ne manquez à vous mesmes et aux moyens

que vous en avez. Et combien que je soye ung vieil resveur, si est ce que Topinion susd. me semble véritable, et je vouldroîs estre si heureux de vous y servir de quelque chose devant que mourir. Mais je ne puis me taire que je ne me plaigne à Votre Majesté de quoy il m'est uzé plus de rigueur que à voz ambassadeurs qui vous ont servy à Rome, Angleterre, Venize et Levant ; toutz lesquelz sont esté changez deux et trois fois depuis que je fuz envoyé par deçà, car il n'y en a eu ung seul d'eulx qui ait les soixante trois ans comme j'ay. Et puis, Sire, que je voy qu'il n'y a personne en votre court qui vous supplie et à la Royne votre mère pour mon congé, je suis rezoUu, si Lasalle ne me l'apporte, de m'aller rendre à voz piedz incontinent après pour faire moy mesme ceste requeste. Et si j'auray mal faict de laisser ce lieu sans successeur, je me confie tant de votre grâce et bonté qu'il vous plaira, Sire, me pardonner; car j'espère que pour mon absence ne s'y perdra rien.

Sire, on uze es royaumes de Castille, Vallence, Aragon et par tout Espaigne de telle rigueur sur les chevaulx grandz et petitz qu'on en veult tirer; aussi faict on entre Castille et Portugal, qu'il n'est permis à homme du monde d'en sortir courtault ny haquenéc tant petit qu'il soit et inutille et ne vaille que ung escu, sans exprez passeport du Roy Catholique. Il est vray que ceulx qu'on enregistre aux passaiges venant de France en Espaigne, on a quarante jours de terme pour les en tirer; mais lesd. jours expirez, il n'en fault plus parler. Je donne cest advis à Votre Majesté, afin qu'il vous plaise, Sire, faire la mesme et semblable defence en votre Royaume pour les chevaulx qu'on passe en Espagne de quelque taille et mesure qu'ilz soient, car cela sera cause qu'ilz seront à meilleur marché en France. Et si les Espaignolz en vouldront, qu'ilz les ayent dores en avant par votre mercy et congé.

Dernier de niay 1571.