DE LA VILLE ET BARONNIE DE CHASTEAV NEVF SVR CHER

Chasteav NEVF est Ville , Chasteau et Baronnie du pays et duché de Berry , près les limites du Bourbonnois , size sur le fleuue de Cher, en pays abondant en bledz, vins, bois, bestail, et estangs. La ville est située sur vn hault rocher fermé de murailles et profonds fossez , comme aussy est le Chastel , qui regarde sur ledict fleuue en forme de Donjon, ayant logis médiocre pour le Seigneur, enuironné de bonnes murailles, grands fossez , et deux pont leuis ; mais la ville s'estend jusques au bas, le long du Cher ; au delà duquel, sur l'Occident , sont les grands faulxbourgs ; et sur ledict fleuue y a six ponts, molins à bledz et à draps , et , tout auprès d'eux , bois d'haulte fustaye, l'un desquels est la Cartellée , et l'aultre l'isle Tatelin. En la ville y a marchés touttes sepmaines , et huict foires franches touts les ans ; et sur ledict fleuue port , barrage , péaage , et pesche pour

le poisson. Ladicte ville est régie par quatre gouuerneurs , qui sont esleus par la voix du peuple , et jugent les criminels , subjects à paine corporelle , soubs l'auctorité du Seigneur et Baron dudict lieu ; lequel a plaine justice en ladicte ville, qui resortit par appel à Dun le Roy ; et soubs icelle y a quatorze Paroisses et quatorze fiefs ; scauoir est : la Paroisse dudict Chasteauneuf , Marigny , Serreul , Ste Lunaize , Lapeu , Corcoy , Ste Baudelle, Villecolin , Montloys , Yneul, Chambon , St Julien, St Symphorien , et Venesme , oultre les chapelles de St Ladre , St Antoine , St Jean la Prehée , St Heloy , et la chapelle du chasteau.

Ladicte ville et Baronnie a aultres foys esté Royalle, mais elle fut par vn Roy Loys, annexée à vn Arnault de CuUant au Chastel d'Yssouldun et la maison dudict Cullant, ce qui a duré jusques en l'an 1552 et 1553, que, par arrest de la cour de Parlement de Paris , elle auroyt esté adjugée à Messire Loys de Chalmazet , Cheualier , Capiteine des gardes du Roy , lequel huict mois après la remist entre les mains de Messire Claude d'Urfé, luy viuant, Cheuallier de l'ordre, et Gouuerneur du Roy daulphin ; et, par son décès , escheue à Messire Jacques d'Urfé , son filz , lequel en l'an 1564 , au mois de Juillet , l'auroit vendue à Messire Claude d'Aubespine , Secrétaire et Conseiller du Roy, en son priué conseil. Et combien qu'enuiron l'an 1490, ladicte terre fut diuisée en trois parties , qui est Chasteauneuf, Jullien et Beauvoir; maintenant ledict seigneur de l'Aubespine possède le tout entièrement. Près ledict Chasteau neuf, le fleuue de Cher entre deux , y a un couuent de Moines noirs, dans le bois appelle le Prieuré de Grammont, qui est d'assez bon reuenu, mais deshabité, et presque tout ruiné il y a plus de vingt ans.

Ladicte terre et Baronnie de Chasteauneuf, du costé du Midy, est limitrophe dans Bourbonnois, de l'Occident, de la terre de Lignières, et riuière d'Arnon ; du Septentrion, de laseptaine de Bourges, et de l'Occident, de la terre de Conderon, et encore de ladicte septaine de Bourges.