HYMNE DE LA SURDITÉ

A p. DE RONSARD, VANDOMOYS

[e ne suis pas, Ronsard, si pauvre de raison De vouloir faire à toy de moy comparaison,

•A toy, qui ne seroit un moindre sacrilège Qu'aux Muses comparer des pies le collège, A Minerve Aracné, Marsye au Delien, Ou à nostre grand Prince un prince Italien.

Bien ai-je, comme toy, suivy dès mon enfance Ce qui m'a plus acquis d'honneur que dechevance : Geste saincte fureur qui, pour suyvre tes pas. M'a tousjours tenu loing du populaire bas, Loing de Tambition, et loing de l'avarice, Et loing d'oysiveté, des vices la nourrice, Aussi peu familière aux soldats de Pallas, Comme elle domestique aux prestres et prélats.

Au reste, quoy que ceulx qui trop me favorisent, Au pair de tes chansons les miennes authorisent, Disant, comme tu sçais, pour me mettre en avant, Que l'un est plus facile et l'autre plus sçavant, Si ma facilité semble avoir quelque grâce. Si ne suis-je pourtant enflé de telle audace, De la contre-pcser avec ta gravité Qui sçait à la doulceur mesler l'utilité.

Tout ce que j'ay de bon, tout ce qu'en moy je prise, C'est d'estre, comme toy, sans fraude et sans feintise, D'estre bon compaignon, d'estre à la bonne foy, Et d'estre, mon Ronsard, demy-sourd, comme toy : Demy-sourd, ô quel heur ! pleust aux bons Dieux que j'eusse Ce bon heur si entier, que du tout je le feusse.

Je ne suis pas de ceux qui, d'un vers triomphant. Déguisent une mouche en forme d'Eléphant, Et qui de leurs cerveaux couchent à toute reste Pour louer la folie ou pour louer la peste : Mais, sans changer la blanche à la noire couleur Et soubs nom de plaisir déguiser la douleur. Je diray qu'estre sourd (à qui la différence Sçait du bien et du mal) n'est mal qu'en apparence.

Nature aux animaulx a cinq sens ordonnez, Le gouster, le toucher, l'œil, l'oreille et le nez, Sans lesquels nostre corps seroit un corps de marbre, Une roche, une souche ou le tronc d'un vieil arbre, Je laisse à discourir au jugement commun L'usage, et différence, et vertu d'un chacun, Lesquelz, pour présider en la part plus insigne. Sont de plus grand service et qualité plus digne : Comme l'œil, le sentir, et ce nerf sinueux Qui, par le labyrinth' d'un chemin tortueux. Le son de l'air frappé conduit en la partie, Qui discourt sur cela, dont elle est avertie : Le pertuis de Touye et les trois petits os. Qui sont à cest effect en noz temples enclos : De quel sage artifice et nécessaire usage La nature a basty ce petit cartilage

Qui, de l'oreille estant le fidèle portier,

Droit sur le petit trou du caverneux sentier

Bat éternellement, si d'une humeur epesse,

Qui pour sa grand' froideur resouldrene se laisse,

Son bat continuel ne se treuve arresté,

D'où vient ce fascheux mal qu'on nomme Surdité :

Fascheux à l'ignorant qui ne se fortifie

Des divines raisons delà philosophie.

Je ne veulx estre icy de la secte de ceulx Qui disent n'estre mal, tant soit-il angoisseux, Fors celuy dont nostre ame est atteincte et saisie, Et que tout autre mal n'est que par fantaisie. Combien que le né sourd, et par tel vice exclus Du sens, qu'on dict acquis, ne s'en fasche non plus (Comme l'on peult juger) que d'estre né sans ailes, Ou n'egaller au cours les bestes plus isnelles, En force les taureaux, les poissons au nager, Ou de ne se pouvoir, comme un Démon, changer : D'autant que le regret vient de la cognoissance Du bien, duquel on a perdu la jouissance. Et qu'on ne doit aucun estimer malheureux Pour ne jouir du bien dont i! n'est désireux, Non plus qu'est un cheval ou autre beste telle, Pour n'avoir, comme nous, la raison naturelle.

Si est-ce toutefois que pour l'homme estre né Un animal docile, auquel est ordonné Contre le naturel de chacune autre beste, D'eslever, plus divin, aux estoilles sa teste : Si par estre né sourd, il ne peult concevoir Rien plus hault que cela que ses yeux peuvent voir,

Sans cognoistre celuy qui homme l'a faict naistre, Malheureux je l'estime, or' qu'il ne le pense estre, Aussi bien que l'on dict (et nous tenons ce poinct) N'estre plus grand malheur que cil de n'estre point.

Mais cestuy-là, Ronsard, qui n'est sourd de nature, Ains l'est par accident, s'il a par nourriture Quelque sçavoir acquis, c'est un sourd animal, Privé d'un peu de bien et de beaucoup de mal. Car tout le bien qu'on peult recevoir par l'oreille, Procède ou d'un doulx son, qui nostre esprit reveille, Ou d'un plaisant propos, dont nostre entendement Reçoit en l'escoutant quelque contentement.

Or celuy qui est sourd, si tel default luy nie Le plaisir qui provient d'une doulce harmonie, Aussi est-il privé de sentir maintefois L'ennuy d'un faulx accord, une mauvaise voix. Un fascheux instrument, un bruit, une tempeste, Une cloche, une forge, un rompement de teste, Le bruit d'une charrette, et la doulce chanson D'un asne qui se plaingt en effroyable son.

Et s'il ne peult gouster le plaisir délectable Qu'on a d'un bon propos, qui se tient à la table, Aussi n'est-il subject à l'importun caquet D'un indocte prescheur ou d'un fascheux parquet : Au babil d'une femme, au long prosne d'un prestre, Au gronder d'un vallet, aux injures d'un maistre, Au causer d'un bouffon, aux broquars d'une court, Qui font cent fois le jour désirer d'estre sourd.

24e DIVERS JEUX RUSTiaUES

Mais il est mal venu entre les damoizelles : O bien heureux celuy qui n'a que faire d'elles, Ny de leur entretien ! car si de leurs bons mots U n'est participant, par faulte de propos Il ne s'eslonne aussi et ne se mord la langue. Rougissant d'avoir faict quelque sotte harangue.

Mais il est soupsonneux, et tousjours dans son cueur Se faict croire qu'il sert d'argument au moqueur : Il ne le doit penser s'il se pense habile homme, Ains pour tel qu'il se croid, doit croire qu'on le nomme.

Mais il n'est appelle au conseil des Seigneurs : O que cher bien souvent s'achètent tels honneurs De ceulx, qui tels secrets dans leurs oreilles portent, Quand par légèreté de la bouche ilz leur sortent !

Mais il est taciturne : ô bien heureux celuy A qui le trop parler ne porte point d'ennuy, Et qui a liberté de se taire à son aise, Sans que son long silence à personne déplaise !

Le parler toutefois entretient les amis Et nous est de nature à cest effect permis : Et ne peult-on pas bien à ses amis escrire, "Voire mieulx à propos, ce qu'on ne leur peult dire ?

Si est-ce un grand plaisir, dira quelque causeur, D'entendre les discours de quelque beau diseur. Mais il est trop plus grand de voir quelque beau livre, Ou lors que nostre esprit du corps franc et délivre

Voyage hors de nous, et nous faict voir sans yeux Les causes de nature et les secrets des cieux : Pour aux quelz pénétrer, un Philosophe sage Voulut perdre des yeux le nécessaire usage, Pour ne voir rien qui peust son cerveau départir Et qui plus que le bruit pcult l'esprit divertir ?

La Surdité, Ronsard, seule t'a faict retraire Des plaisirs de la Court, et du bas populaire. Pour suyvre par un trac encores non battu Ce pénible sentier qui meine à la vertu. Elle seule a tissu l'immortelle couronne Du Myrthe Paphien, qui ton chef environne : ■ Tu luy dois ton laurier, et la France luy doit Qu'elle peult désormais se vanter à bon droit D'un Horace, et Pindare, et d'un Homère encore, S'elle void ton Francus, ton Francus qu'elle adore Pour ton nom seulement, et le bruit qui en court : Dois-tu donques, Ronsard, te plaindre d'estre sourd ?

O que tu es heureux, quand le long d'une rive Ou bien loing dans un bois à la perruque vive. Tu vas, un livre au poing, méditant les doulx sons, Dont tu sçais animer tes divines chansons. Sans que l'aboy d'un chien ou le cry d'une beste Ou le bruit d'un torrent t'alourdisse la teste. Quand ce doulx aiguillon si doulcement te poingt Je croy qu'alors, Ronsard, tu ne souhaites point Ny le chant d'un oyseau, ny l'eau d'une montagne, Ayant avecques toy la Surdité compagne, Qui faict faire silence, et garde que le bruit Ne te vienne empescher de ton aise le fruict.

Mais est-il harmonie en ce monde pareille A celle qui se faict du tintin de l'oreille ? Lors qu'il nous semble ouïr, non l'horreur d'un torrent, Ains le son argentin d'un ruisseau murmurant, Ou celuy d'un bassin, quand celuy qui l'escoute S'endort au bruit de l'eau, qui tumbe goutte à goutte.

On dict qu'il n'est accord, tant soit mélodieux, Lequel puisse égaler la musique des Cieux, Qui ne se laisse ouïr en ceste terre basse, D'autant que le fardeau de ceste lourde masse Hebete noz esprits qui, par la Surdité, Sont faicts participans de la divinité.

Regarde donc, Ronsard, s'il y a mélodie Si doulce que le bruit d'une oreille essourdie. Et si la Surdité par un double bienfaict Ne recompense pas le mal qu'elle nous faict, En quoy mesmesles Dieux, Déesse, elle resemble, Qui vous versent l'amer, et le doulx tout ensemble.

O que j'ay de regret en la doulce saison. Que je soulois régner paisible en ma maison, Si sourd, que trois marteaux tumbans sur une masse De fer estincelant n'eussent rompu la glace Qui me bouchoit l'ouye, heureux, s'il en feut onc : Las feussè-je aussi sourd, comme j'estois adonc !

Le bruit de cent vallets, qui mes flânez environnent, Et qui soir et matin à mes oreilles tonnent, Le devoir de la Court, et l'entretien commun. Dont il fault gouverner un fascheux importun.

Ne me fascheroit point : un créditeur moleste (Race de gens, Ronsard, à craindre plus que peste) Ne troubleroit aussi l'aise de mon repos, Car, sourd, je n'entendrois ne luy, ne ses propos.

Je n'orrois du Castel la fouldre, et le tonnerre, Je n'entendrois le bruit de tant de gens de guerre. Et n'orrois dire nrial de ce 'bon PereSainct Dont ores sans raison toute Rome se plaingt, Blasmant sa cruauté et sa grand' convoitise, Qui ne craint (disent-ilz) aux despends de l'Eglise Enrichir ses nepveus et troubler sans propos De la Chrestienté le publique repos.

Je n'orrois point blasmer la mauvaise conduite De ceux qui tout le jour traînent une grand' suite De braves courtisans, et pleins de vanité, Voyant les ennemis autour de la cité.

Portent Mars en la bouche et la crainte dans l'ame : Je n'orrois tout cela et n'orrois donner blasme A ceux qui nuict et jour dans leur chambre enfermez Ayant à gouverner tant de soldats armez, Font aux plus patiens perdre la patience, Tant superbes ilz sont et chiches d'audience.

Je n'entendrois le cry du peuple lamentant Qu'on voise sans propos ses maisons abbatant. Qu'on le laisse au danger d'un sac epouventable Et qu'on charge son doz d'un faiz insupportable. O bien heureux celuy qui a receu des dieux Le don de Surdité ! voire qui n"a point d'yeux,

Pour ne voir et n'ouïr en ce siècle où nous sommes Ce qui doit offenser et les Dieux, et les hommes.

Je te salue, ô saincte, et aime Surdité ! Qui pour throsne et palais de ta grand' majesté T'es cave bien avant soubs une roche dure Un antre tapissé de mousse, et de verdure : Faisant d'un fort hallier son effroyable tour, Où les cheutes du Nil tempestent à l'entour.

Là se void le Silence assis à la main dextre Le doigt dessus la lèvre ; assise à la senestre Est la Melancholie au sourcil enfonsé ; L'Estude tenant l'œil sur le livre abbaissé Se sied un peu plus bas ; l'Ame Imaginative, Les yeux levez au ciel, se tient contemplative Debout devant ta face, et là dedans le rond D'un grand miroir d'acier te faict voir jusq'au fond Tout ce qui est au ciel, sur la terre, et soubs l'onde, Et ce qui est caché soubs la terre profonde ; Le grave Jugement dort dessus ton giron, Et les Discours ailez volent à l'environ.

Donq', ô grand' Surdité, nourrice de sagesse. Nourrice de raison, je te supply, Déesse, Pour le loyer d'avoir ton mérite vanté Et d'avoir à ton loz ce Cantique chanté, De m'estre favorable, et si quelqu'un enrage De vouloir par envie à ton nom faire oultrage. Qu'il puisse un jour sentir ta grande deité, Pour sçavolr, comme moy, que c'est de Surdité.