PIÈCE CXCVII

[1447] Extrait des instructions données par les consuls à Guillaume Beceij, licencié en lois, et à Jacques Mathieu, procureur de la ville, par les consuls de Lyon qui les envoyent en mission auprès de Charles VU ; paragraphe relatif aux pillages des gens d'armes logés en Vélection de Lyonnais.

Item est a demonstrer au roy nostre dit segniour que comme il ait esté ja pieça de son vouloir et plaisir establir et ordonnez pour vivre tant en la dite ville de Lion comme au dit païs de Lionnois certain nombre de gens d'armes et de trait et jusque au nombre de XXX hommes d'armes et iceulx gens d'armes ait voulu et mandé estre paiez tous les mois de leurs gaiges affin qu'il n'eussent cause de rien prande ne pillier sur le povre puple et que combien que iceulx gens d'armes n'ont esté tousjours paiez et satisfais de leurs dis gaiges, tellement qu'il n'aient heu cause de desemparer leur lougiz et en oultre leur donnast et paia la dicte ville XXX sols pour lance pour supplément et action de leurs lougiz, ce non obstant puis deux ou troys mois ença iceulx gens d'armes de leur auctorité privée et sans congié ne licence des commissaires a ce par le roy ordonnez ont desemparé leurs dis lougiz et se sont mis sus les champs en la compaignie de certains autres cappitaines et gens d'armes descendus de France ou ilz ont faitbiaucopt de maulx et d'oppressions au povre puple tant en pillieres, batures que autremant en empeschans le laborage du povre puple et ont tenus les dis champs pour l'espace de six sepmaines saul le plus, en supplians au roy nostre dit seigneur qu'il soit de son plaisir et bonne grâce pourveoir sus ce et soy declairer, s'il est de son plaisir et entencion que les dis gens d'armes soient paies de leurs dis gaiges et qu'ilz tiennent les champs comme dessus est dit; laquelle chose s'ainsi estoit ne pourroit supporter ne endurer le dit povre puple et sur ce obtenir rebat des dis gaiges des dis gens d'armes du dit temps qu'il ont tenu les champs, se fere se peut et aussi s'il se peut fere obtenir diminucion du dit nombre des dis gens d'armes, actendu que la ville et païs de Lionnois qui n'a pas plus de VU ou VIII lieues de long et troys ou quatre de large est bien et tropt chargé des dis XXX hommes d'armes, au regart des autres païs, mesmement de Beaujeloys qui est plus grant et plus fertil et toustesfoys ou dit païs de Beaujeloys n'a que XIllI lances, et se par aventure l'en demandoit pour quel raison et ocasion les dis gens d'armes ont desemparé leurs dis lougiz respondre sur ce que se a esté selon que disoient les dis gens d'armes pour ce que les cappitaines et commisseres députez sus eulx leurs retenoient et retiennent LX\' sols tournois pour lance et que par ainsi ilz se compenseroient sus le plat païs des dis LXV sols a eulx retenus comme

dessus.

(Arch. mun. de Lyon, CC 290, n° 20, fol. 2 r°.)