PAR HENRI IV

(Fin1.')

En ce temps le sr de Vitri estoit à Dreux avec ces troupes de cavallerie et d’infanterie, qu’on avoit envoyez pour nostre secours; et luy envoyé des messagiers, mesme ung de mes laquais y alla et revint deux fois, et pour ce qu'il me demandoit un homme de créance, qui luy sceu rendre compte des advenus, je luy en envoyé deux bien montez sur deux de mes chevaulx, qui valloient bien six cens escus; l’un s’appelloit Radepont, l’autre s’apelloit la Rivière. Je leur donnay charge de leur dire que nous manquions d’hommes et de poudres. Ledit Radepont revint au bout de cinq ou six jours avec un soldat de Dreux, et nous raporta que le sr de Vitri n’ayant passé à propos, s’en estoit retourné à Paris, et son compagnon demoura là avec dessein d’aller trouver Monsieur du Maine, pour luy faire entendre l’état où nous estions et nos nécessitez.

Je ne manquois d’envoyer des messagers à Paris et vers mondict seigneur et messieurs de la ville, leurs enchargeant de faire entendre combien peu d’hommes nous avions pour une ville de si grande garde. En ce mesme temps il en revint un qui nous aporta lettres de mondit seigneur escriptes au camp de Lagni, et y en fut envoyé aussy à Orléans, et avons continué tousjours d’en faire sortir le plus que nous avons peu ; de quoy la plus part ne sont pas revenus, et crois qu’ilz ont esté pris des ennemis; et depuis l’assault du ravellin, continuoient à le prendre pied a pied, tirant