LIVRE V, CHAPITRE XLVIII

Panurge, deffeublant sa gualleverdine et accoustrement mystique, respondit :

« Aussi seras tu, beste immonde.

Damné, comme une male serpe.

Et seray ainsi comme une herpe Sauvé en paradis gaillard :

Lors bien sus toy, pauvre paillard,

Pisseray je, je t’en asceure.

Mais escoutez : advenant l'heure Qu'à bas seras au vieux grand diable.

Si par cas assez bien croyable.

Advient que dame Proserpine Fust espinée de l'espine Qui est en ta brague cachée.

Et fust de fait amourachée De ta dite paternité.

Survenant l’opportunité

Que vous feriez les doux accords,

Et luy montasses sus le corps ;

Par ta foy, envoyeras tu pas Au vin, pour fournir le repas,

Du meilleur cabaret d’enfer,

Le vieil ravasseur Lucifer ?

Elle ne fut onques rebelle Aux bons freres, et si fut belle.

— Va, vieil fol, dist frere Jean, au diable ! Je ne saurois plus rithmer, la rithme me prend à la gorge ; parlons de satisfaire icy. »