DO GOUVERNEMENT ET SEIGNEUR DE CESTE ANNÉE

Quelque chose que vous disent ces folz astrologues de Lovain, de Numbei^, de Tubinge et de Lyon, ne croyez que ceste année y aie aultre gouverneur de l’universel monde que Dieu le créateur, lequel par sa divine parolle tout regist et modéré, par laquelle sont toutes choses en leur nature et propriété et condition, et sans la maintenance et gouvernement duquel toutes choses seroient en un moment reduictes à néant, comme de néant elles ont esté par luy produictes en leur estre. Car de luy vient, en luy est et par luy se parfaict tout estre et tout bien, toute vie et mouvement, comme dict la Trompette evangelicqne Monseigneur Sainct Paul, Rom. xi. Doneques le gouverneur de ceste année et toutes aultres, selon nostre veridicque résolution, sera Dieu tout-puissant. Et ne aura Saturne, ne Mars, ne Jupiter, ne aultre planete, certes non les anges, ny les saincts, ny les hommes, ny les diables, vertuz, efficace, puissance, ne influence aulcune, si Dieu de son bon plaisir ne leur donne : comme dict Avicenne, que les causes secondes ne ont influence ne action aulcune, si la cause première n’y influe; dict-il pas vray, le petit bon hommet?