Chapitre LIV

Cy n'entrez pas, hypocrites, bigotz, Vieulx matagotz, marmiteux, borsouflez, Torcoulx, badaulx, plus que n'estoient les Gotz Ny Ostrogotz, précurseurs des magotz ; Haires, cagotz, caffars empan touflez, Gueux mitouflez, frapars escorniflez, Befflez, enflez, fagoteurs de tabus, Tirez ailleurs pour vendre voz abus.

Voz abus meschans Rempliroient mes camps De meschanceté Et par faulseté Troubleroient mes chants Vous abus meschans.

Cy n'entrez pas, maschefains practiciens, Clers, basauchiens, mangeurs du populaire, Officiaulx, scribes et pharisiens, Juges anciens, qui les bons parroiciens Ainsi que chiens mettez au capulaire.

Vostre salaire est au patibulaire :

Allez y braire; ici n'est faict excès,

Dont en voz cours on deust mouvoir procès.

Procès et debatz Peu font cy d'ebatz, Où l'on vient s'esbatre; A vous pour debatre Soient en pleins cabatz Procès et debatz.

Cy n'entrez pas, vous, usuriers chichars, BrifTaulx, leschars qui tousjours amassez, Grippeminaulx, avalleurs de frimars, Courbez, camars, qui en vous coquemars De mille marcs jà n'auriez assez; Poinct esguassez n'estes, quand cabassez Et entassez, poiltrons à chiche face ; La maie mort en ce pas vous deface.

Face non humaine De telz gens qu'on maine Raire ailleurs : céans Ne seroit seans ; Vuidez ce dommaine, Face non humaine.

Cy n'entrez pas, vous, rassotez mastins, Soirs ny matins, vieux chagrins et jaloux; Ny vous aussi, séditieux, mutins, Larves, lutins, de Dangier palatins, Grecz ou Latins, plus à craindre que loups ;