CHAPITRE VIII
plaisans entrelatz d'orfeverie, garniz de fins diamens, fins rubiz, fines turquoyses, fines esmeraugdes et unions Persicques, vous l'eussiez comparée à une belle corne d'abondance, telle que voyez es antiquailles, et telles que donna Rhea es deux nymphes Adrastea et Ida, nourrices de Jupiter ; — tousjours gualante, succulente, resudante, tousjours verdoyante, tousjours fleurissante, tousjours fructifiante, plene d'humeurs, plene de fleurs, plene de fruictz, plene de toutes délices. Je advoue Dieu s'il ne la faisoit bon veoir! Mais je vous en exposeray bien dadvantaige au livre que j'ay faict De la dignité des braguettes. D'un cas vous advertis, que, si elle estoit bien longue et bien ample, si estoit elle bien guarnie au dedans et bien avitaillée, en rien ne ressemblant les hypocriticques braguettes d'un tas de muguetz, qui ne sont plenes que de vent, au grand interest du sexe féminin.
Pour ses souliers furent levées quatre cens six aulnes de velours bleu cramoysi. Et furent deschicquettez mignonement par lignes parallelles joinctes en cylindres uniformes. Pour la quarreleure d'iceulx, furent employez unze cens peaulx de vache brune, taillée à queues de merluz.
Pour son saie furent levez dix et huyt cens aulnes de velours bleu, tainct en grene, brodé
à l'entour de belles vignettes et par le mylieu de pinthes d'argent de canetille, enchevestrées de verges d'or avecques force perles: par ce dénotant qu'il seroit un bon fessepinthe en son temps.
Sa ceincture feut de troys cens aulnes et demye de cerge de soye, moytié blanche et moytié bleu (ou je suis bien abusé).
Son espée ne feut Valentienne, ny son poignard Sarragossoys, car son père hayssoit tous ces indalgos bourrachous, marranisez comme diables ; mais il eut la belle espée de boys et le poignartde cuir bouilly, pinctz et dorez comme un chascun soubhaiteroit.
Sa bourse futfaictede lacouille d'un oriflant que luy donna Her Pracontal, proconsul de Libye.
Pour sa robbe furent levées neuf mille six cens aulnes moins deux tiers de velours bleu comme dessus, tout porfilé d'or en figure diagonale, dont par juste perspective yssoit une couleur innommée, telle que voyez es coulz des tourterelles, qui resjouissoit merveilleusement les yeux des spectateurs.
Pour son bonnet furent levées troys cens deux aulnes ung quart de velours blanc. Et feut la forme d'icelluy large et ronde à la capacité du chief, car son père disoit que ces bonnetz à la Marrabeise, faictz comme unecrouste de pasté,
