CHAPITRE I

que par don souverain des cieulx nous a esté réservée l'antiquité et geneallogie de Gargantua plus entière que nulle auitre, exceptez celle du Messias, dont je ne parle, car il ne me appartient, aussi les diables (ce sont les calumniateurs et cafFars) se y opposent. Et fut trouvée par Jean Audeau en un pré qu'il avoit près l'arceau Gualeau, au dessoubz de l'Olive, tirant à Narsay, duquel faisant lever les fossez, touchèrent les piocheurs de leurs marres un grand tombeau de bronze, long sans mesure, car oncques n'en trouvèrent le bout par ce qu'il entroit trop avant les excluses de Vienne. Icelluy ouvrans en certain lieu, signé, au dessus, d'un goubelet à l'entour duquel estoit escript en lettres Ethrusques : Hic bibitur, trouvèrent neuf flaccons en tel ordre qu'on assiet les quilles en Guascoigne, desquelz celluy qui au mylieu estoit couvroit un gros, gras, grand, gris, joly, petit, moisy livret, plus, mais non mieulx sentent que roses.

En icelluy fut ladicte généalogie trouvée, escripte au long de lettres cancelleresques,non en papier, non en parchemin, non en cere, mais en escorce d'ulmeau, tant toutesfoys usées par vétusté qu'à poine en povoiton troys recongnoistre de ranc.

Je (combien que indigne) y fuz appelle, et,

à grand renfort de bezicles,practicant l'art dont on peut lire lettres non apparentes, comme enseigne Aristoteles, la translatay, ainsi que veoir pourrez en Pantagruelisant, c'est à dire beuvans à gré et lisans les gestes horrificques de Pantagruel.

A la fin du livre estoit un petit traicté intitulé : Les Fanfreluches antidotées. Les ratz et blattes, ou (affin que je ne mente) aultres malignes bestes, avoient broustéle commencement; le reste j'ay cy dessoubz adjousté, par révérence de l'antiquaille.

Les Fanfreluches antidotées, trouvées en un monument antique.