Chapitre XVIII

aistre Janotus, tondu à la cesarine, vestu de son lyripipion à l'antique, et bien antidote l'estomac de coudidignac de four et eau beniste de cave se transporta au logis de Gargantua, touchant davant soy troys vedeaulx à rouge muzeau, et trainant après cinq ou six maistres inertes, bien crottez à profit de mesnaige.

A l'entrée les rencontra Ponocrates, et eut frayeur en soy, les voyant ainsi desguisez, et pensoit que feussent quelques masques hors du sens. Puis s'enquesta à quelqu'un desditz maistres inertes de la bande, que queroit ceste mommerie. Il luy feut respondu qu'ilz demandoient les cloches leurs estre rendues.

Soubdain ce propos entendu, Ponocrates

courut dire les novelles à Gargantua, affin qu'il feust prest de la responce et deliberast sur le champ ce que estoit de faire. Gargantua, admonesté du cas, appella à part Ponocrates son précepteur, Philotomie son maistre d'hostel, Gymnaste son escuyer, et Eudemon, et sommairement conféra avecques eulx sus ce que estoit tant à faire que à respondre. Tous feurent d'advis que on les menast au retraist du goubelet et là on lesfeist boyre rustrement, et, affin que ce tousseux n'entrast en vaine gloire pour à sa requeste avoir rendu les cloches, l'on mandast, cependent qu'il chopineroit, quérir le prevost de la ville, le recteur de la Faculté, le vicaire de l'église, esquelz, davant que le sophiste eust proposé sa commission, l'on delivreroit les cloches. Après ce, iceulx presens, l'on oyroit sa belle harangue. Ce que fut faict, et, les susdictz arrivez, le sophiste feut en plene salle introduis et commença ainsi que s'ensuit, en toussant.

La harangue de maistre Janotus de

Bragmardo faicte à Gargantua

pour recouvrer les cloches.