Chapitre XXVII

ant feirent et tracassèrent, pillant et larronnant, qu'ilz arrivèrent à Seuillé, et détroussèrent hommes et femmes, et prindrent ce qu'ilz peurent: rien ne leurs feut ne trop chault ne trop pesant. Combien que la peste y feust par la plus grande part des maisons, ilz entroient partout, ravissoient tout ce qu'estoit dedans, et jamais nul n'en print dangier, qui est cas assez merveilleux : car les curez, vicaires, prescheurs, medicins, chirurgiens et apothecaires qui alloient visiter, penser, guérir, prescher et admonester les malades, estoient tous mors de l'infection, et ces diables pilleurs et meurtriers oncques n'y prindrent mal. Dont vient cela, Messieurs? Pensez y, je vous pry.

Le bourg ainsi pillé, se transportèrent en l'abbaye avecques horrible tumulte, mais la trouvèrent bien reserrée et fermée, dont l'armée principale marcha oultre vers le gué de Vede, exceptez sept enseignes de gens de pied et deux cens lances qui là restèrent et rompirent les murailles du cloz affin de guaster toute la vendange.

Les pauvres diables de moines ne sçavoient auquel de leurs saincts se vouer. A toutes adventures feirent sonner ad capitidum capitulantes. Là feut décrété qu'ilz feroient une belle procession, renforcée de beaulx preschans, et letanies contra hostium insidias, et beaulx responds pro pace.

En l'abbaye estoit pour lors un moine claustrier, nommé Frère Jean des Entommeures, jeune, guallant, frisque, de hayt, bien à dextre, hardy, adventureux, délibéré, hault, maigre, bien fendu de gueule, bien advantagé en nez, beau depescheur d'heures, beau desbrideur de messe, beau descroteur de vigiles, pour tout dire sommairement vray moyne si oncques en feut depuys que le monde moynant moyna de moynerie, au reste clerc jusques es dents en matière de bréviaire.

Icelluy, entendent le bruyt que faisoient les ennemys par le cloz de leur vine, sortit hors pour veoir ce qu'ilz faisoient, et, advisant