XXXV. —— HENRI IV A MALVYN

(Paris, 20 mars 1610.)

Archives municipales de Bordeaux, ms. Delpit, f° 167 r°, copie. Lettre du Roy escrite à M. de Cessac.

De par le Roy.

Nostre amé et feal, si vous ne jugés bien aussi bien que nous à quel dessain l’arrest de nostre cour de parlement de Bourdeaus du XVII febvrier dernier a esté donné, les pratiques et mentes qui ont esté aportées de la part de nos advocatz generaus, et combien nous avons juste occasion de mescontantement d’un tel proceder, nous vous ferions la presente plus longue. Mais elle sera seulement pour vous dire qu’envoyant à nostre dite cour sur ce subject nos lettres patantes qui vous seront mises en main, vous nous ferés service très agreable de vous employer avec affection à ce que, suivant icelles, les arrestz de nostre conseil et ce que nous avons tant de fois mandé à nostre dicte court, les charges et fonctions des substitutz de nostre dict procureur general en icelle et des jurisdictions y ressortissans soyent reglées et que nous n’ayons plus la peine d’en escrire une autre fois.

Donné à Paris, le XX° jour de mars 1610.

Signé : HENRY.

. Et plus bas : FORGET.