François, baron d’Arros

receu par procureur à faire et recevoir les sermens accoustumez en la réception des nouveaux Rois. Les Estas y firent résistance et ledit Philipe vint à Tudelle, où le 26 d’aoust il fut reconnu et receu pour Roy et fit le serment aus dits Estas et eux à luy. Entre autres choses le jurement du Roy contenoit qu’il ne mettroit gouverneurs, capitaines ne garnisons aux places fortes ni officiers de la justice que Navarrois naturels, mais tout ainsi que lors qu’il le juroit, il n’avoit aucune volonté de le tenir, aussi n’en fit-il rien après le jurement, car les forteresses et les principaux estas de la justice demeurèrent et sont encores aujourdhuy ès mains des Castillans. Voilà comme les Princes, qui ne reconnoissent autre Dieu que leur force, ni loy que leur ambitieuse convoitise, sans aucune crainte de Dieu ni honte des hommes, osent jurer publiquement tout le contraire de ce qu’ils font et ont arresté de faire, et pensent s’eslre bien acquitez de leur devoir, si seulement ils ont juré de le faire. Mais le jurement oblige la conscience et l’observation d’iceluy l’acquitte. Et celuy est plus coulpable qui jure le bien qu’il ne veut fere que celuy qui fait le mal sous jurement de ne le faire. Et les Estas lui firent le jurement de fidélité et hommage avec toutes les cérémonies requises, le sacre et le couronnement exceptez qui furent réservez jusques après le décez du père.