Copie du temps. Archives de Grenoble, B 2824, f

de sont sanc et tous barons, etc., comme la Royne de Cesile et ses enfans, les dus de Bretagnie, de Savoie, d’Alanson, les comte de Foys et meins autres pour aviser et metre fin en cest dolouroux debat ; et sans faute est de propos de tenir et acomplir tout ce que par heux sera avisé et conclus, combien que l’on dit que son entente n’est point de soit tenir à Paris, mes vuet vivre en ses pays et visiter ses seignouries, et, comme je entans, vuet avoir le governement de Lengadoc et le payis de Lyonnoys, et ne foys point doucte que aucun tractié ne se mecte; et sur ce sont mandés tous nous dis seigneurs, à toute lur poissance. Le comte de Foys et le seigneur de Larbrat hont envoyé à ly, et les seigneurs d’Auvernie, pour ly offrir que sont tous pres de le servir; et sont partis les messages pour les aler avancier. Et vous sertifie que les trois estas d'Auvernie sont assamblés à Monferrant pour aviser au fet du payis; et part aujourduy messire Jehan de Langiac et un des gens du conseil de mon dit seigneur pour aler à heux, pour lur dire la volunté que monseigneur le Daufin a propoussé de tenir. Et tout ce je vous sertifie, mes tres chiers seigneurs. Monseigneur escript presentement à monseigneur le bailly et de la Faiete, et à vous, lettres clouses et patantes, es quex j'ai escript ne vous escripre; mès le chevauchour a oblié ma lettre; dont je suis bien doulant. Si vous sertifie que mon dit seigneur a grant confiance en la ville et de tout le payis. Si vous suppli que vuilliez aviser en ce que mon dit seigneur vous escript es chouses espediens à fere, quar pour le present est à point. Et vous avise d'une parolle que monseigneur le Daufin dit à monseigneur de Vertus à Gien sur Loire, parlant du debat de cest royaume en ceste maniere : « Monseigneur et nous « verrons meintenant la bonne volunté de nous sugés et vrays « obeissans. » Si vous sertifie que c'est un seigneur de tres grant cuer, et que incontinant qu’il a dit une chouse la vuet maintenir.

Mes tres chiers seigneurs, vuilliez savoir que le payis de Vellay, comme le Puy, etc., de par les estas dudit payis, hont envoyé à mon dit seigneur pour ly ouffrir que sont près de obeyir à ly. Pleisse vous savoir que il a esté dit en plein conseil que la ville de Lion et le payis c'estoit tournés, dont checon fut bien esbayis. Si le me fut dit; et sur ce je escussey la ville, etc. Mès je vous suppli que ce que vous fareis, vous fectes pour grant et meure deliberacion. Et me samble, à courrection parlant, que vous avés à rescripre à mon seigneur le Daufin, avant que procedissiés autremant, la cause il a voulunté de de metre gens au Daufiné, ce besoin fet, etc. Ses chouses dessus