DE PAR LE REGENT, ETC

Vous gens d’eglise, bourgeoïs et habitans de la ville de Martigny les Nonnains !, nous tenons vous avoir bien sceu nostre venue en ces marches. Et pour ce que ne savons quelle est vostre entencion, pour les manières qu'avez cy par avant tenues, nous vous mandons et commandons bien expressement, et sur la loyaulté, subgestion et obeissance que vous devez et estes tenuz faire à Monseigneur et à nous, comme son seul fils, que, incontinent ces lettres veues, les six ou les quatre plus notables d’entre vous, ayans pour tous les autres ample et suffisant pouvoir, venez parler à nous, où que soyons, pour nous rendre et faire, au nom de mon dit seigneur et nostre, telle obeissance comme faire devez, sachans de vray, et de ce vous assurons, que se ainsi le faictes, nous nous tiendrons à contens de vous, et, en mettant en oubly toutes choses passées, vous reputerons pour vrays et loyaux subgez, vous maintendrons par vous bien desormais gouvernant en nostre bonne grace, et ne souffrirons qu'à l'occasion des dictes choses passées aucun empeschement ou desplaisir vous soit fait, en corps, ne en bien, en general ne en particulier, en quelque manière que ce soit. Et par ces mesmes presentes donnons bonne seurté de sauf conduit à tous ceulx d’entre vous qui ainsi viendrons par devers nous, auxquels, ne à leurs gens ou chevaux, ne autres biens, ne voulons, ains defendons, que aucun empeschement ou destourbier leur soit fait ou donné, tant en venant et sejournant par devers nous, comme aussi en eulx retournant, pour quelque cause ou à quelque occasion que ce puist estre. Et ou cas que ainsi ne le ferez, et se prestement n'avons sur ce responce de vous qui nous doye estre agreable, nous vous voulons bien signifier et faire savoir que, sans plus vous en rescrire, nous y pourvoirons, par voie de fait et autrement, de tel et si prompt remède qne par effet connoistrez le desplaisir que nous y prendrons, et que trop tard sera de vous en repentir ou de