DE PAR LE REGENT DAULPHIN

Nos amés et feaulx, nous avons sceu comment vous avés fait difficulté de baiïller plenement à nostre amé et feal Conseiller et chambellan Guillaume d'Avaugour, ou à Philippon Chanteprime pour lui, la possession et saisine de nostre chastel du Bris et de la garde et gouvernement d'icellui que avons bailliez au dit Guillaume d’Avaugour, se le dit Philippon ne vous prometoit de rapporter caucion, comme il est acoustumé de faire par dela. Si vous faisons savoir que, en greigneurs choses, avons toute confiance de la personne du dit d'Avaugour, lequel, comme bien savés, est continuelement occupé entour nous en nostre service, telement que par dela ne pouroit bonnement‘aler, pour baillier la dicte caucion. Et pour ce voulons et nous plaist que, de la promesse que vous en avoit pour lui faicte le dit Philippon, le tenés quicte et deschargé, et que vous faictes et souffrés nostre dit conseiller, et le dit Philippon pour lui, joir à plain de la dicte capitainerie, sans plus vous arrester en aucune maniere au bail de la dicte caucion, car tele est nostre volonté, non obstans les status et ordenances gardés par dela, et quelconques ordonnances, mandemens ou deffences sur ce faictes au contraire. Et affin qu'il vous appere que ce procede de nous, nous avons escript nostre nom à ces presentes. |

Escript à Chinon le xv° jour d'avril.