La Cronicque martinienne, f. CCI vo

Le Roi à la ville de Strasbourg Vienne, 3 novembre 1456.

A noz très chiers et grans amis les bourgois et habitans de la ville de Strabourg.

CHARLES, PAR LA GRACE DE DIEU, ROY DE FRANCE

Très chiers et grans amis, nous tenons que savez assez comme notre très chier et très amé filz le Dauphin de Viennois, à nostre très grant desplaisance, s’est par longue espace de temps esloigné de nous et tenu hors nostre royaume, lequel nostre filz, puis aucun temps en Ca, a envoyé par devers nous aucuns de ses gens, à tous lesquels avons fait response que, s’il vouloit venir devers nous, comme bon filz doit envers son seigneur et père, nous estions contens et prestz de le recueillir benignement en nostre bonne grace, lui pardonner et oblier toutes les choses du temps passé, et

le recevoir comme bon père doit son bon et obéissant filz. Laquelle.

chose jusques cy il n’a voulu faire, ainçois a esté ci très mal conseillé que tousjours il a perseveré à dire qu'il ne vouloit venir devers nous ne se trouver en nostre presence, qui est chose bien estrange, consideré mesmement que nous, qui tousjours avons désiré par doulceur et benignité le reduire, comme pour:son bien

et honneur lui feust très neccessaire et prouffitable, avons dit à ses

dictes gens, et depuis lui avons escript par lettre signée de nostre main, que s’il faisoit aucunes doubtes ou qu'il eust aucunes craintes ou souspecons, quant il nous en advertiroit nous l’en asseurerions telement qu’il en devroit bien estre content et n’auroit cause de riens doubter. Mais, ce neantmoins, dès si tost qu’il a oy et sceu par le rapport de ses dictes gens ladicte response, de laquelle raisonnablement il se devoit moult esjoir, incontinent s’est soubdainement party et absenté du pais du Daulphiné où il estoit, au desceu de la pluspart de toutes ses gens et de ceulx dudit pais, dont avons esté bien esmerveillez et desplaisans. Et, pour ce que par aventure nostre dit filz, par la suggestion de ceulx qui ainsi dommaigeablement pour lui l’ont conduit et conseillé, vouldroit entreprendre de faire guerre ou porter prejudice ou dommaige à aucuns des princes, seigneurs, villes ou communitez des marches

de par delà, lesquels pourroient croire ou ymaginer que ce seroit de nostre sceu, consentement ou permission, nous vous avons bien voulu escripre et faire savoir les choses dessus dictes, pour la singulière amour et affection que tousjours vous avons congneu avoir à nous et à la maison de France, afin que soyez acertenez que, se nostre dit filz ou autres estans où adherans avecques lui entreprenoient quelque guerre, question ou querelle, ce n’est de nostre sceu, vouloir ne consentement, mais est et seroit à nostre desplaisance.

Donné à Vienne, le troisième jour de novembre.

CHARLES

DE LA LOËRE!.

Le Roi à ses gens des comptes

Saint-Priest, 19 mars 1451.

DE PAR LE ROY

Noz amez et feaulx, nous avons entendu que le patriarche d’Anthioche, à son vivant president de noz comptes, est naguères alé de vie à trespas;.et pour ce que desirons que oudit office soit pourveu de homme notable et tel que à icellui officè appartient, et que, par les ordonnances derrenièrement faictes sur le fait des offices de nostre royaume, est expressement dit que, quant ledit office de president ou ung des offices de maistre de nozdiz comptes seront Yacans, vous assemblerez avec vous nostre advocat en Parlement et nostre procureur general et eslirez trois personnes teles que verrez en voz consciences estre dignes et suffisans pour lesdiz offices obtenir et excercer, et, ladicte eleccion faicte, nous envoyerez les noms de ceulx que ainsi aurez esleuz et choisiz pour en prendre l’un ou autrement en disposer ainsi que verrons estre à faire pour le mieulx, nous, en ensuivant ladicte ordonnance, voulons et vous mandons que, appellez avec vous nozdiz advocat et procureur, procedez à l’esleccion dudit office de president de noz comptes, ainsi et par la manière que dit est; et, ce fait, nous envoyez les noms de ceulx que aurez ainsi esleuz pour en prendre et accepter l’un, ou autrement en faire ainsi que bon nous semblera. Et avec ce nous

1. Original signé sur parchemin. Archives municipales de Strasbourg, AA 1852.