A CEUX DE GENÈVE

(Archives de Genève, portefeuille des pièces historiques, dossier N° 1070.)

S. grâce et paix en Jésucrist nostre seul saulveur !

Noz très chers frères et bien aymés en Jésucrist. Nous avons entendu que le Dieu de gloire, père de miséricorde vous a visité de sa grâce comme ses enffans esleuz avant la

constitucion du monde, et maintenant vous appelle de sa voix éternellement permanente et salutaire, laquelle ne peult estre congneue fors de ses vrays enffans, qui ne sont point néz de cher ny de sang, mais de Sainct Esperit ; vous démonstrant de sa grâce les grandes richesses de sa gloire, lesquelles il a préparé à tous ceulx qui croyront en luy et ensuyvront sa saincte Parolle, le congnoissant seul et vray Dieu et icelluy qu'il a envoyé, Jésucrist, délaissant les élémens du monde, la doctrine des hommes, et prenant icelle de nostre seul Saulveur Jésucrist, laquelle seuUe nous fait nouvelles créatures et héritier du royaulme des cieulx en croyant à icelle de cueur et sans honte ny crainte des hommes; la confessant saincte, bonne et juste et seule salutaire, et toutes aultres doctrines contrevenans à icelle estre meschantes et dampnables. Lesquelles choses avez fait et faicles comme vrays chevalliers cristiens et fidèles en Jésucrist, n'ayant point esgard aux biens mondains et hommes transitoires; ne craignant de desplaire à voz parens et supérieurs ennemys de vérité. Pareillement, n'avez crainte du grant nombre et puissance de voz ennemis, mais estes prestz pour Jésucrist, qui a fait nostre rédemption et la rémission de tous noz péchez par sa grâce, non seullement habandonner voz biens, honneurs et parens, mais renoncez à vous mesmes, confessant avec le bon sainct Fol que glayve ny tribulacion, ny les choses présentes, ny les advenir, ny la mort, ny la vie ne vous sépareront de l'Evangille de salut. Nous doncques voz frères principallement en la seconde génération spirituelle, ayant la foy que avez en Jésucrist et vostre grande constance, nous resjoyssons en esperit de vostre félicité, et prions incessamment le Père de gloire, duquel avons tous biens, tant spirituelz que temporelz, et sans lequel rien ne pouvons faire, excepté péché, luy priant que son bon plaisir soit vous augmenter vostre foy et parachever ce qu'il a commencé en vous, vous envoyant l'esprit de sapience et révélacion, clariffiant les yeulx de vostre cueur par la vraye lumyère de la Parolle évangélicque, à celle fin que puissiez congnoistre icelluy très doulx et miséricordieux Père, et l'espérance en laquelle il vous appelle et tous fidèles, par laquelle puissez congnoistre les grandes et inexprimables richesses préparées à vous et à tous ceulx qui sont sancliffiéz par le sang de Jésucrist. Lesquelles choses congneues, nous ne doublons point que incontinent ne soyez tout prestz à renuncer le prince de ce monde et tous

ses satalites, sus la bannyère desquelx vous et nous avons chemyné, comme poures aveugles, et pour le service et labeur que avyons fait suz iceulx:, n'actendions que la mort spirituelle. Mais maintenant nostre Seigneur vous baille à congnoistre que ne suyvez plus telz maistres, pour le service desquelx n'actens que la mort, mais que à luy seul baillez honneur et révérence, et que recongnoissez qu'il est seul Dieu et seul Saulveur, pardonnant les péchez pour l'amour de luy, qui est riche en tous, donnant le royaulme des cieulx pour néant à tous ceulx qui croyent en luy sans avoir aulcunes doubles en toutes ses promesses, ne suyvant plus la doctrine des hommes, ny ce que nous semblera beau et bon, mais tant seullement le commandement de Dieu, nostre bon Père, sans y adjouster ny dyminuer, lequel scet que nous est nécessaire raieulx que nous mesmes. Pourquoy, noz très chers frères, recepvez la ParoUe du grant Pasteur qui s'est baillé une seulle fois sacriffié, en ostie vivante, pour le salut de tous croyans; et regardez que ceste grâce ne soit regectée et foulée aux piedz, mais qu'elle soit escriple en vos cueurs, la distribuant à tous vers les aultres encopre ignorans et infirmes par doulce et amyable instruction, à celle fin que le petit tropeau de Jésucrist se puysse journellement augmenter par vous comme dispensateurs des mistères de Dieu et gardes d'enseigne en la terre, le trésor de nostre Seigneur. Mays faictes qui soit communiqué à tous ceulx qui le vouldront recepvoir, et vous prions de rechief que faictes apparoir le tesmoingnage de vostre foy, laquelle est desjà annuncée par tout le pays deçà, par laquelle plusieurs nycodémysans se déclairent et manifestent ayant bonne espérance que par vostre moyen la saincte Evangille sera en plusieurs pays manifeste. Nous vous prions que délaissez la crainte des hommes, car nostre Seigneur Dieu est pour vous, contre lequel tout le monde ne peult rien. Il vous plaira sçavoir de nos nouvelles, lesquelles nous voulons communiquer comme à noz fidèles et bons amys. Nostre cordelier nous a délaissé, lequel a fait pys que Symon Magus, qui vouloit acheter la grâce de nostre Seigneur par argent ; mais le malheureux caffard représentant le second Judas, l'a vendue. Et en a prins une somme d'argent, et après s'en est allé luy et son argent en perdicion. Quant à ceulx qui ont baillé l'argent, se sont des aultres Cayphes et annes et presbtres de la loy, lesquelx cuydant destruyre la loy de Jésucrist en le faisant morir et

exaulcer leurs faulces et perverses doctrines, leur est advenu tout au contraire. Ainsi espérons que bien tost adviendra à tous ces malheureux sacrifficateurs, lesquelx pourtant la clef de science, n'entrent au royaulme des cieulx et ne veuillent permectre les aultres y entrer. Mais leur ypocrisie est jà si manifestée, que chascun la congnoit. Vous advertissant que de nostre Cordelier ne sommes aulcunement marryz , car il ne nous preschoit la vérité, etsinel'entendoit point; en quoy nostre Seigneur nous a fait grant grâce nous en dépescher. Nous avons à présent ung qu'il nous presche et lyt en chambre tous les jours, qui est grande édifficacion à la destruction du royaulme papisticque. Nous avons toute nostre espérance au Père des lumyères, duquel procède tout bien et toute donacion parfaicte, que sa saincte ParoUe, avant trois sepmaines ou ung mois, dedans nostre ville, sera purement et publiquement annuncée en despit de Sathan et de ses adhérans, combien que les papisticques soyent troys foys plus que nous, et si sommes circuytz de villes et villages de tous costéz qui nous menassent ; et pareillement avons de groz princes et seigneurs qui journellement ne cessent s'efforcer par or, par argent et menasses et tous aultres moyens de suffocquer et mectre soubz les piedz la ParoUe de Dieu, laquelle leur est scandalle, et à nous salut et justiffication. Mais à l'entrée du duc, nous leur avons monstrer que voulions que un chascun scieust et congneust que estions amateurs de l'Evangille. Et pour autant que les hommes ne peuvent congnoistre le cueur, leur avons monstre par signe extérieur. Car, sans craindre toutes les menasses à nous estre faictes, avions chascun à son bonnet une plume de coq; par lequel signe l'on nous appelloit tous luthériens. Mais nostre Seigneur Dieu qui en sa main tient toute puissance, les a remis en telle sorte qu'ilz ne nous ont fait ne dit desplaisir, ne nous à eulx. Et sommes plus constans que jamays. La grâce, nostre Seigneur Dieu. Noz très honorés seigneurs et très redoubtéz messeigneurs de Berne, noz chiers allyéz et confédérez sont tousjours de plusfort en plusfort délibérez, de n'espargner ny corps, ny puissance à soubstenir tous leurs amys et allyéz, bourgeois et subjetz qui vueillent tenir le saint Evangille. Car ils les veullent maintenir envers tous et contre tous. Nostre Seigneur Dieu leur veuille augmenter et accroistre leur bon vouloir, lequel les a suscitez pour tenir en crainte, selon le monde, les ennemis de vérité. Pourquoy si vous avez affaire de leur

auctorité et puissance, en tout ce que pensiez que sera à l'honneur et gloire de Dieu et à l'avancement de sa Parolle, nous ne doubtons point que vous et nous ne les trouvons en nostre nécessité en ayde et secours, comme bons, fidèles et loyaulx amys. Que sera la fin, priant le Seigneur Dieu aucteur de toute bonté, vous donner la grâce que soyez persévérans en la foy de Jésucrist jusques à la fin. Escript à Payerne ce IX^ de juillet l'an 1532,

Par voz frères en Jésucrist, les amateurs de l'Evangille en Payerne.

Nous vous envoyons une chausson spirituelle sur les dix commandemens, par le présent porteur, composée par M. Anthoine S. qui à présent est avec nous, avançant la saincte Evangille.