LA PREMIÈRE EST DE LA CITÉ
La est l'église cathédrale de Nostre Dame , qui par dedens a de long deux cent pies , et de large quatre-vingt pies. Si sont es trois premières entrées quarante colombes que on puet environner; aussi y a vingt colombes dont il a à chascune une chappelle que on ne puet environner. Entour le cuer de l'église sont aussi autant de coulombes et de chappelles. La place qui est ou milieu de l'église , c'est entre le cuer et l'entrée , contient autant d'espace comme de douze colombes ; et y a six chappelles. Entour le cuer sont entailliés de pierre les fais des apostres, et l'istoire de Joseph le patriarche, de plaisant ouvrage, et maistre Pierre du Coingnet. A l'entrée est l'image de saint Christofle , de merveilleuse haulteur et noble ouvrage. En ceste église est le chief saint Philippe l'apostre , et le chief saint Marcel , evesque de Paris , et diverses reliques pluseurs. La table du grant autel dessus et celle de desoubz sont d'argent dorez. Il y a deux clochiers où il a autant de degrez comme il a de jours en l'an. En l'un est une cloche que l'en puet à paine par quatre fois avironner, les bras estendus. H y a une chappelle de costé comme l'en va au chapitre , de merveilleuse façon : et y est la légende Job entaillée ; et par dehors l'église sont belles y mages. Auprès de l'église est le palais l'evesque d'un costé : là tient- on les plais devant l'offîcial de l'evesque et devant ses auditeurs ; aussi le maistre des testamens y tient sa court. D'autre costé demeurent les chanoines; et y est la court de l'ofticial et de l'archediacre. La dicte église de Nostre-Dame est d'excellent ouvrage dedens et dehors.
En la Cité sont quinze églises paroschiales; c'est assavoir de Saint- Pierre-aux-Beufs, de Saint-Pierre-des -Assis , de Saint-Christofle , de Sainte-Marie -Magdalaine, de Sainte -Marine, de Saint -Denis -de- la- Chartre, où Nostre-Seigneur acoramenia saint Denis, de Saint-Berte-
lemy, de Sainte-Genevieve-des-Ardans , de Saint-Simphorien , de Saint- Landry, de Saint-Germain-le-Vieil , de Sainte-Croix, de Saint-Jehan-le- Rond, de Saint-Massias et de Saint-Michiel. En la Cité est la prieuré de Saint-Eloy et le collège nommé Dix-Huit.
