DU PALAIS

Le Palais Royal dure dès le grant Pont où est l'orologe jusques à Pont Neuf. La salle du palais a de long six vingt pies et de large cinquante pies ; il y a huit colombes : là est la table de marbre de neuf pièces ; là sont les y mages des roys qui ont régné en France ; là sont procureurs de parlement et advocas. La sale des merchiers a de long quatre vingt pies. La vent-on divers joyaux d'or, d'argent, de pierres prescieuses et autres.

En la Sainte Chappelle est grant partie de la sainte croix, de la sainte couronne , et autres benoites reliques à merveilles ; et y a ung grant pié d'un griffon.

Au Palais sont salles et chambres pour logier le Roy et les douze pers. Si est de bel édifice à tours et ymages dedens et dehors ; et y a beau jardin. Au palais sont les seigneurs de parlement où les Roys de France ont accoustumé de seoir en jugement. Là sont les seigneurs des requestes qui ont cognoissance des causes des officiers du Roy. Là est la chambre des seigneurs des comptes , des trésoriers , des receveurs , du concierge et d'autres officiers. Là est l'audience. Et devant le palais demeure ung pottier d'estain , bon ouvrier de merveilleux vaisseaux d'estain, et tenoit des rossignols qui chantoient en yver.

Le grant hospital que le roy saint Loys fonda dure dès l'église Nostre- Dame jusques à Petit Pont ; si a devant hospital , en rue neufve, trentesept manoirs, avec une boucherie et place vuide devant la chappelle de Pospital.