XLIY. LES CHATS-CHATEAUX BRÛLÉS PAR LE FEU GRÉGEOIS

209. Li frere le roy gaitoient les chas-chastiaus de jour, et montoientou chastel en haut, pour traire aus Sarrazins des arbalestres de quarriaus qui aloient par mi l'ost aus Sarrazins. Or avoit li roys ainsi atirié que, quant li roys de Sezile guietoit de jour les chaschastiaus, et nous les deviens guietier de nuit. Celle journée que li roys de Sezile guieta de jour, et nous deviens guietier la nuit; et nous estiens en grant inesaise de cuer, pour ce que li Sarrazin avoient tout confroissié nos chas-chastiaus. Li Sarrazin amenèrent la perriere de grant jour, ce que il n'avoient encore fait que de nuit, et geterent le feu gregois en nos chas-chastiaus.

210. Lour engins avoient si acouplez aus chaucies que li os avoit faites pour bouchier le flum, que nulz n'osoit aler aus chas-chastiaus, pour les engins qui getoient les grans pierres, et cheoient en la voie. Dont il avint ainsi que nostre dui chastel furent ars ; dont li roys de Sezile estoit si hors dou sens, que il se vouloit aler ferir ou feu pour estaindre ; et se il en fu courouciez, je et mi chevalier en loanies Dieu ; car se nous eussiens guietié le soir, nous eussiens estei tuit ars.