XXVI. d'un clerc qui tua trois sergens do roi

114. Li roys manda tous ses barons à Paris, et leur fist faire sairement que foy et loiautei porteroient à ses enfans, se aucune chose avenoit de li en la voie. Il le me demanda; maiz je ne voz faire point de sairement, car je n'estoie pas ses hom^.

115. Endementres que je venoie, je trouvai trois homes mors sur une charrette, que uns clers avoit tuez ; et me dist-on que on les menoit au roy. Quant je oy ce, je envolai un mien escuier après, pour savoir comment ce avoit estei. Et conta mes escuiers, que je y envoyai, que li roys, quant il issi de sa chapelle, ala au perron pour veoir les mors, et demanda au prevost de Paris comment ce avoit estei.