HONNEUR

Sa Majesté, de tous tant estimée, Feray si hault par la force extoller, Qu'à tout jamais on en verra voler Dessus les cieulx sa noble renommée.

Le vieux Limoges et trois autres personnages entrèrent en scène et s'exprimèrent ainsi :

LE PREMIER

Rome, voyant ses Cezars retournez Des régions loingtaines, grandes indices Monstroyt de joye, or combattant aux lisses, Et s'estudiant à ses temples orner.

LE SECOND

Voyre le tout tapisse richement, Les quarrefours, les rues, les maisons, Dont je concludz, en suyvant les raisons, Qu'au prince fault fere tel traictement.

LE TROISIÈME

Suz donc, amys ! laissons ceste tristesse Que si long temps nos paovres cueurs tenuz En langueur a, puys que sommes venuz Au point de la désirée liesse.

LE PREMIER

C'est bien raison de tout enuy chasser.

Or maintenant, puys que le roi arrive, Digne sur tous, que plus que Nestor vive, Et que ne vient que biens nous pourchasser.

LE SECOND

C'est bien raison que chacun à part soy Et le commun ensemble ressentir ; S'on veult que ciel et terre retentir De joye on fasse au venir de ce roy.

LE TROISIÈME

Aussi le veult nostre père Limoges, Qui travailler long temps on peut veoir, Pour dignement son seigneur recepvoir, A préparer le mieux qu'il peut ses loges.