NOMINATION D'UN BAILL! DE SAINT-SAUVEUR

, 11 mars 1405.

A tous ceulx qui ces presentes lettres verront ou orront, Gharlez, baron. et seigneur. d'Yvry , chambellan et conseiller du roy nostre sire , salut. Savoir faisons que, pour le bon rapport et tesmoignage qui fait nous a esté de la personne de Pierre de Lastelle , et nous conffians à plain des sens , lovalté, prodommie et bonne diligence du dit Pierres, icelui Pierre avons fait , ordonné , commis et establi, et par ces presentes , par vertu du don et povoir à nous fait et donné par le roy nostre dit seigneur , faisons; ordonnons , commettons et establissons bailli de Saint Sauveur le Viconte, mettez et appartenances d'icelui , à tenir, avoir et excersser le dit office de bailliage aux droiz, gaiges, proffiz et emolumens à ce apparttenans et acoustumez, tout en la fourme et manère que naguères la souloit tenir , avoir et excersser feu Michel Rosselin, et avons donné et donnons au dit Pierre plain povoir et auctorité de faire eu dit office , mettez et apparttenances d'icelui, tout ce qui apparttient et peult apparttenir à faire , par quelque manére que ce soit. Sy donnons en mandement à tous les officiers et subgez du dit bailliage , prions et requerons tous autres, que au dit Pierre de Lastelle, en faisant et excerssant le dit office, obtissent et entendent diligenment, comme à bailli bien et deuement et suffisanment fait, commiz, ordonné et establi, et lui donnent et prestent consel , confort et aide, se mestier en a.

EN. s

Et en oultre donnons en mandement à Guillaume Jouhan, viconte du dit lieu de Saint Sauveur,età tous les autres vicontez à venir, que au dit Pierre paient par chascun an les gaigez acoustumez à icelui office , qui sont de quinze livres tournois, aux terme ou termez et manere acoustumez , et par rapportant ces presentez lettres ou vidimus d'icellez, avecquezquictance d'icelui Pierre , les diz gaigez seront alouez ès comptez des diz vicontez et rabatus de leurs receptez saus aucun contredit. En tesmoing de ce, nous avons scelléez ces dictes presentes lettres de nostre propre seel. Ce fut fait le xr' jour de mars , l'an mil quatre censet quatre. J. COCHET.

( Copie du 29 juin 1405, à la Bibl. Imp., Cabinet. des titres, 2* sé rie des originaux, au mot Lastelle.)