LIVRE VI

deschiré, ses habillemens renouez, et sembloit n'avoir jamais dormi ailleurs que sur le foin : ses cheveux estoient tous hérissez, comme un aspergez, entrelardez de festus de paille, et de brins de chaulme. Le peigne n'y avoit jamais passé, mais bien quelquefois l'estrille de ses bœufs. Aussi, estoitil teigneux, et avoit tousjours ses ongles en ses cheveux, parce qu'il estoit fort tourmenté de ces grands poux d'Esclavonie. Il portoit un petit sayon de gros bureau, tout deschiré, lequel vous n'eussiez sçeu juger s'il estoit à l'endroit, ou à l'envers : dessoubs iceluy, il avoit une chemise de gros canevas, laquelle il ne blanchissoit qu'une fois l'an. Approchant devant le Prêteur, il s'esmerveille de ce qu'une si grande compagnie se rangeoit près de luy pour le regarder. <( 0 mon amy, dit-il alors, Barbe Tognazze, où m'as tu amené ! Je ne veux plus, Tognazze, demeurer davantage en ce fenil : ramenes-moy à la maison; car l'envie d'aller à mes affaires me presse. — Qu'as-lu à braire, dit Tognazze, quand tu vois Monsieur estre present? Va, or sus, maraut, advances-toy plus avant, va là! Que t'amuses-tu? A qui parle-je ? va là, diable : touche la main de Monsieur; fais le petit, plie le genouil, et dis : Bon soir vous soit donné, Monsieur le Podestat ! » Zambelle veut bien faire comme Tognazze luy monstre. Mais, estant courtisan, peu pratiqué en la court, n'ayant hanté que les porceaux, il advint qu'estant le siege du Podestat, lequel les anciens ont nommé chaire, fort haut eslevé, il falloitmonterhuict marches pour en approcher. Zambelle, s'y acheminant, jette sa veuë sur le prêteur, et tenoit tousjours ses yeux fichez sur luy, ne se souvenant point de hausser les pieds, et, ne regardant à bas, heurte bien rudement contre la premiere marche, et tombe à la renverse, et cheant sur l'eschine, il se demote la cheville du pied, et se rompt le cropion. Je vous laisse à penser si plus d'une centaine, qui estoyent là presens, ne s'éclattcrent pas bien à force de rire. Chacun, de plaisir qu'il en prenoit, frappoit en ses mains, faisant tous en ceste sale uii grand applaudissement. Tognazze se levé en cholere, et prend un baston, avec lequel il avoit envie d'aplanir un peu les espaules de Zambelle, et les charger de bois, et luy dit; (( T'ay-je ainsi apprins? tay-je enseigné la faconde parler ainsi, beste que tu es? Dy, pendard? As-tu si-tost oublié ce que t'ay apprins ce matin? Ne l'ay-jepas monstre, gros buttier, comme tu devois faire des belles reverences

devant Monsieur, et que tudcvois avoir ton nez bien mouché, et que tu luy devois dire, Bonne vie, Monsieur! » Et, ce dit, voulant encore instruire ce vilain à bien et dextrement plier le genouil, Zambelle, laschant du derrière un gros pet, s'en voulut en aller; car il pensoit que ce tonnerre eust amené une pluye, qui eust ensafrané sa chemise. Une odeur en print aux nez des assistans, non telle, qu'est celle, qui procède do la poudre à canon faicte avec eau vive, salpêtre, et autres drogues inventées pour faire cesle marchandise diabolique : mais elle tenoit de la senteur des aulx, eschalotes, oignons, ciboulles, et pourreaux. Alors fut encore plus manifeste la sottise de Tognazze. Vous-mesme pensez si la risée n'en fut pas grande, chacun se bouchant le nez à belles mains? Tognazze excuse l'autre, et allègue que ce bruit, qu'ils ont prins pour un pet, n'est venu que de la rupture de la boucle de sa ceinture. Mais sa face demonstra la faute. Il tire neantmoins Zambelle, l'appelle faineant, idiot, le pousse, le picque, pensant par ce moyen couvrir sa honte.

Zambelle nullement exercé en tel art, pendant qu'il veut mettre à effect les enseignemens de son précepteur, il fait une reverence si belle, et si legiere, qu'avec le genouil il rompt une des marches, et estendant la main, le Podestat la prenant, luy dit : « Soit bien venue la premiere et plus recommandée louange de Gipade ! » Puis le feit asseoir à sa dextre; et là, ce bel orateur, qui estoit plus Ciceronian qu'aucun autre, commença à compter de ses ennuys, ayant par ses estudes acquis une aussi grande abondance de bien dire, qu'un bœuf en sçauroit apprendre en se léchant les fesses. La harangue de Zambelle es meut fort les Sénateurs, sçachant dextrement embrocher tout ce qui est requis pour une vraye persuasion. Et la plus grande louange qu'on luy donnoit estoit qu'en discourant de son faict, il sautoit souvent, comme un subtil docteur du coq à l'asne, et quand il deschiffroit ses plaintes pour les meschancetez de Balde,.il entremesloit souvent que sa vache avoit faict un veau, et qu'il vouloit en donner un caillotin à Monsieur le Podestat tout frais. Et combien que ses propos fussent obscurs, neantmoins la grande prudence de Gaioffe entendoit bien tout. Et là-dessus on donne jugement contre Balde, par lequel il est dit qu'il tiendra priso!i perpétuelle jusques à la mort, et que Zambelle sera mis en possession de tous les biens par luy prétendus.