XIV. — 1469, MAI OU JUIN

escripvit unes lettres closes, unes autres au chancelier, unes au bastart de Bourgoigne, unes a messire Guillaume de Bische et unes a l'archidiacre de Cluny, pour haster l'ambaxade de mondict seigneur de Bourgoigne de venir devers le Roy; et porta, avec ce, unes petites lettres de créance de la main dudict cardinal, laquelle créance estoit sur ledict Durand.

Item, et laquelle créance estoit en efTect, ainsi que dit ledict Durand, qu'il dist a monseigneur de Bourgoigne toutes les bonnes paroles dont il se sceust adviser, et que le Roy avoit grant amour et grant fiance a mondict seigneur de Bourgoigne et qu'il desiroit fort que ses ambax[ad]eurs vensissent, et qu'il estoit délibère de jamaiz ne rompre avec luy, et qu'il n'actendoit que la venue de son ambaxade, et qu'il avoit cscript a ceulx de sa court de Parlement et aux gens de son Conseil que tout ce qu'il avoit accordé a mondict seigneur de Bourgoigne fut entretenu, et, pour ce, qu'il plust a mondit seigneur de Bourgoigne envoier son ambaxade, et qu'en auroient bonne expédition.

Aussi lui dist que icelluy cardinal lui supplioit qu'il le voulsist tousjours avoir en sa bonne grâce, et que si l'abbaye de Cluny vacquoit, il le voulsist avoir pour recommandé et tenir la main envers nostre Sainct Père, parce qu'il scet ce qu'il feroit envers le Roy, qu'il y tiendroit semblablement la main de sa part.

Dit que mondict seigneur de Bourgoigne lui respondit qu'il aymoit bien ledict cardinal, et qu'il estoit bien son ami, et feroit pour luy tout ce qu'il pourroit.

Et ledict cardinal dit que la créance qu'il avoit baillée audict Durand estoit telle, c'est assavoir que depuis que l'assemblée avoit esté faicte du Roy et de mondict seigneur de Bourgoigne*, le Roy ne luy avoit point tenu les termes qu'il faisoit par avant, et qu'il requeroit qu'il lui voulsist aider et porter ainsi qu'il lui avoit promis, ou autrement, il estoit homme perdu.

Sur quoy, mondict seigneur de Bourgoigne lui escripvit pareillement une petite lettre de créance, laquelle estoit qu'il