CHAPITRE VIII

Comment la dame ouvrit son couratge au petit Saintrè , luy monstrant qu'elle le voulait aymer.

LA DAME. — << Or çà, comme bon chrestien et gentilhomme que vous estes, vous me promectez sur Dieu, sur vostre foy de chrestien, et sur vostre honneur, cy n'a que vous et moy qui nous puisse ouyr, que de choses que

je VOUS die, à personne qui puisse vivre ne mourir, par quelque façon que ce soit, vous ne direz, ne descouvrerez, ne ferez savoir ce que je vous diray présentement, ne autres fois ; et que ainsi de vostre main en la mienne le me promectez ? — Oui, dict il, ma dame, sur ma foy. »

La Dame. — Alors ma dame luy dist : « Or çà, Saintré, se j'estoye celle que vous ay dit, et vous voulsisse, pour moy servir loyaulment, faire des biens, et à grant honneur parvenir ; me vouldriez vous obeyr ? »

L'acteur. — Le petit Saintré qui en service de telle dame d'amours oncques n'avoit eu pensée, ne sceut que dire, fors soy agenouiller, et dit : « Ma dame, je feroye tout ce que vous me vouldriez commander. — Ainsi de vostre main en la mienne vostre foy me promectez ? — Ouy, par ma foy et par ma loyaulté, ma dame, ainsi que je le vous promectz, le tiendray, et feray tout ce que me vouldrez commander. — Or vous levez et entendez bien mes paroUes et les retenez.