CHAPITRE XLII

Comment l'ung contre l autre desmarcherent, et combatirent très vaillamment.

ET quant le mareschal eut fait son cry, l'ung contre l'aultre desmarcherent si que ce sembloit deux lyons deschainez ; mais au desmarchier que fist Saintré, il s'escria à haulte voix : « A ma très doulce dame, à qui je suis ! » Et lors commencèrent l'ung sur l'aultre à ferir. Messire Enguerrant, qui très vaillant chevalier estoit, fort et puissant, et plus grande personne que Saintré n'estoit, haussa sa haiche, et le ferit tel coup au dessus de la charnière, que tout le fit chancelier ; et Saiutré l'actaint de l'estoc de sa hache au pertuis de la visière, qui le fist ung grant pas en arrière desmarcher. Lors messire Enguerrant rehaulsa sa hache, et de toute sa force descend son coup, ainsi que premier avoit fait ; mais Saintré, qui le premier coup avoit jà bien senti, se couvrit de sa hache, tellement qu'il ne fut point touché. Alors messire Enguerrant rehaussa sa

l86 LE PETIT JEHAN DE SAINTRÉ

hache pour feiir ; mais Saintré, au desmarcher qu'il fist, descharge et l'actaint du tranchant de sa hache sur les dois de sa main droicle, tellement que riens n'y vault la rondelle, que tous les dois ne luy froissast et endormist. Messire Enguerrant estant chault, non sentant le meschief qu'il avoit, cuyda hausser sa hache, mais, alors qu'il sentit sa dolleur, ne peut sa hache soubtenir, et, comme chevalier hardy et preux, tint fort sa hache en sa main senestre, ouvrant ses bras pour soy lyer avecques Saintré. Mais quant Saintré apperceut sa voulenté, combien qu'il ne sçavoit pas le meschief, pour paour d'estoc de sa hache, ferit souvent, et ne laissoit approucher de lu}'. Et quant il se fut âdvisé, tout à coup luy donna tel coup sur la main senestre qui la hache tenoit, que du poing la lui fist cheoir à terre. Et quant messire Enguerrant se vit sans hache, comme désespéré, tout à coup s'advança et vint Saintré par le corps lyer ; et Saintré se defïent luy d'ung bras, car de l'aultre tenoit sa hache. Et quant le roy vit la hache de messire Enguerrant à terre, et leurs deux corps lyez, comme prince et juge droicturier, prestement gecta sa verge et dist : « Ho ! Ho ! » Alors par les gardes furent les champions despartis. Et à ces paroUes le roy par le seneschal les fist devant luy venir, et puis leur fist dire : « Vous, messire Enguerrant, et vous,

Jehan de Saintré, le roy vous mande que tous deux avez si haultement et si vaillamment fait voz armes, voz devoirs et voz honneurs, que on ne pourroit mieulx. Selon le contenu de la lectre de voz armes, Jehan de Saintré, le seigneur roy qui cy est, dit qu'elles concluent combattre de voz haches, tant que l'ung soit porté par terre, ou sa hache perdue de ses deux mains, dont le comprins d'icelles, Jehan de Saintré, le seigneur roy vous adjuge le pris.» Alors tous deux, qui à genoulx estoient, le roy commanda lever, et les faire de leurs bassinetz desarmer. Et quant Saintré entend le jugement et sentence du roy, tant humblement qu'il peut, l'en remercia, disant : « Très excellent et puissant prince, de l'honneur que il vous plaist moy faire, et de la sentence de noz armes, que pour moy vous adjugez, si très humblement que sçay et puis, vous en remercie ; mais au regard du pris que m'adjugez, si très humblement vous supplie que sur ce vous plaise trop mieulx penser et bien adviser comment monseigneur mon frère, qui cy est, m'a de sa hache bien festoyé ; et ce que j'en ay fait, sire, n'a été que d'adventure, dont y devez penser. » Desquelles paroUes dictes par Saintré furent tous les cueurs des escoutans esmerveillés, dont par ce les langues furent à tous et à toutes desliées pour le louer ; et quelque amour qu'ilz eussent à

messire Enguerrant, tenir ne se povoient qu'ilz ne dissent de Saintré que vrayement il estoit bien la montjoye et l'addresse de tout honneur et d'humilité. Le roy en son hourt, et tous les seigneurs qui avecques luy estoient, en furent tous très esmerveillez ; la royne, ma dame Alienor de Cardonne, femme dudit messire Enguerrant, et toutes les aultres princesses, contasses, baronnesses, dames et damoiselles qui au hourt de la royne estoient, se prindrent toutes à le très grandement louer. Et messire Enguerrant, aux aultres qui entour luy estoient, ne se povait tenir de dire : « Or escoutez le très noble parler de cestuy ; où est celluy, ne où fut oncques, qui d'ung tel honneur se voulsist desarmer en ceste manière, pour le donner à sa partie contraire ? » Le roy, qui tant prenoit plaisir à oyr les louanges qu"on disoit de Saintré qui ne prenoit garde à luy et encores estoit à genoulx, subitement luy commanda à lever, et puis luy dist : « Jehan de Saintré, à ce que vous me requérez que je me advise, je vous respons que j'en suis tout ad visé ; et affin que chascun congnoisse la grâce et honneur que Dieu vous a aujourd'hui donnée, je la vous vueil garder. » Alors le roy ordonna que messire Enguerrant courtoisement luy rendist sa hache, et du surplus fist son devoir, quant seroit désarmé. Et lors messire Enguer-

rant se fist bailler sa hache, et de sa main blecée, au myeulx qu'il peut, à l'ayde de sa senestre, sa hache courtoisement luy rendit, disant : « Mon frère, je vous rens vostre hache, et du surplus m'acquiteray, ainsi que en voz lectres d'armes est contenu, priant à Dieu et à monseigneur sainct George, que de bien en mieulx vous accroissent voz honneurs. » Et quant Saintré entent l'ordonnance du roy et le gracieulx parler de messire Enguerrant, se fist bailler son bracelet, que l'ung de ses gens tenoit. Lors, ayant receu sa hache, à messire Enguerrant s'enclina, et dist : « Monseigneur mon frère, puis que le bon plaisir du roy est tel, je luy vueil obeyr; mais vous, comme celluy qui l'avez bien desservi, je m'acquitte et vous donne mon bracelet, en vous priant de très bon cueur que le preniez en gré. » Messire Enguerrant et tous les aultres furent plus émerveillez que oncques n'avoient esté ; messire Enguerrant luy dist : « Ha! mon frère Jehan de Saintré, voz honneurs cesseront ilz jamais ? De vostre bracelet et de l'honneur que vous me faictes, je vous remercie, tant comme je puis ; mais à vostre très belle dame vous le retournerez en vérité. » Et à ces paroUes le roy demanda quelz prières ilz faisoient? le mareschal luy dist : * Sire, c'est Jehan de Saintré qui, à toute force,' veult donner à messire Enguerrant son

igO LE PETIT JEHAN DE SAINTRÉ

bracelet, ainsi que s'il l'avoit gaigné, ou eust le pris. — Le bracelet ? » dist le roy. Lors se tourna vers les princes et aultres seigneurs qui avecques luy estoient, et leur dist : « Et que dictes vous de l'honneur et vaillance d'ung si jeune escuyer ? Oncques tel ne veis. — Et vrayement, dirent les aultres, sire, aussi ne veismes nous ; et, à la vérité, bien semble qu'il est de noble lieu party, et qu'il a bien veu et aprins en la très noble court où il a esté nourry; et aussi le sont tous ceulx de sa compaignie. » Et ces paroUes finées, incontinent le roy ordonna que son bracelet voulsist garder ; et quant Saintré entend le roy, à genoulx luy dist : « Ah ! sire, pour Dieu mercy, au moins soyez content que en aultre part je l'employé. — En aultre part, dist le roy, nous l'accordons ; le bracelet est vostre, employez le là où il vous plaist ; mais nous ne vouldrions que on dist que ce fust par nous, ne par nostre jugement, que l'eussiez donné. — Sire, dist Saintré, vostre bonne mercy. » Lors appella le roy d'armes d'Arragon, Thouraine et Lesignen, les heraulx qui estoient avecques luy venuz, et au roy d'armes bailla le bracelet, puis tous trois les envoya à ma dame Alienor de Cardonne, femme de messire Enguerrant, qui ou hourt de la ro)'ne estoit, en disant : « Recommandez moy très humblement à elle, et comme à celle

que par raison je doy penser et croire que sur toutes c'est celle qui myeulx a desservy le bracelet ; laquelle je requiers et prie que, de par ma très redoubtée dame qui le me donna, luy plaise le prendre en gré très plaisant, que pour l'honneur et amour d'elle il n'est pas riche et tel comme à elle appartient. » La royne, ma dame Alienor et les autres princesses et dames, qui avecques elles estoient, aussi le roy, qui en son hourt à dextre estoit, et tous les aultres seigneurs de sa compaignie, n'est point à escripre se tous furent esmerveillez. Lors ma dame Alienor au roy d'armes et heraulx respondit : « Roy d'armes, et vous aultres heraulx, mes amys, ce très gracieulx et vaillant escuyer de Saintré je remercie ; mais, sauve sa grâce, je ne suis pas celle qui ay ce bracelet gaigné, ne desservy envers luy, comme il dict, mais c'est bien à celle par qui il a ce jour tant de grâce et honneur acquis, et pour ce luy reporterez, et luy direz qu'il me soit pardonné. » La royne, comme très saige et advisée dame, quant elle entendit celle parolle, luy dist : « Et vrayement, Belle Cousine, vous ne debvez pas cest honneur refuser, et d'ung si très accompli gentil homme comme cestui est ; si vous prie et requiers que le preniez. » Lors ma dame Alienor fist le vouloir de la royne ; et en son bras senestre la royne voult

estre celle qui au bras lui mist. Et quant ledit bracelet fut ou bras de ma dame Alienor mis, lors elle, du pendant de son collier ung très bel et riche affiquet print, d'une très fine et grosse perle de quatre à cinq caratz, environnée de trois très gros dyamans et de trois très beaulx rubis, que au roy d'armes elle bailla, puis luy dist : « Vous, et vous heraulx qui estes cy, donrez vous cette petite bague à ce très gracieulx escuyer Jehan de Saintré, en moy recommandant à luy de très bon cueur ; et luy direz que jaçoit ce que son bracelet appartenoit trop plus et myeulx à sa très belle et très bonne dame qu'à moy, toutes fois à sa requeste je l'ay prins ; et qu'il me semble que sa très belle dame aucunement se doit sentir de l'honneur qu'il a ce jour acquis ; et pour ce vous prie que de par moy ce petit afficquet vous luy bailliez, luy priant que, en moy bien recommandant à elle, le luy vueille présenter. » Lesquelles paroUes dictes, et bagues prinses et données, quant le roy le sceust, il en fut très content; lors commanda que tous deux fussent desarmez. Lors chascun de son costé s'en retourna pour monter à cheval ; et quant Saintré fut à cheval monté, incontinent se trahit vers messire Enguerrant, qui pour la doUeur de sa main se faisoit aucun peu habiller ; et quant il aperceut Saintré, lui dist : « Ha !

frère, vostre dame vous a elle commandé que de telz picaudes festoyez ceulx qui se jouent avecques vous? » Et quant ilz furent montez à cheval, lors fut la grant prière entr'eulx, qui pour l'honneur l'uug de l'autre sauldroit le derrennier. Le roy, qui entendoit que l'honneur fust à Saintré, incontinent manda que tous deux saillissent per à per ; mais pour ce que Saintré avoit le pris, voult qu'il allast à la dextre main. Et puis chascun, comme il estoit venu, alla en son logeis; mais au départir furent les grans prières, car chascun veut accompaigner son compaignon. Et quant le roy vit leurs prières, de rechief leur envoya dire que ces grans honneurs laissassent, c'est assavoir que chascun print son chemin. Lors prindrent congié l'ung de l'autre, et s'en allèrent en leur logis desarmer et reposer tout le jour jusques à l'heure du soupper, que la royne les envoya quérir. Dont, pour abréger, là furent de bons vins et viandes, de metz et d'entreraetz, très largement serviz ; puis de chaiiçons, de danses et de morisques de plusieurs façons, moult joyeusement festoyez. Et à tant laisseray cy à parler des grans honneurs, des disners et des souppers que le roy, la ro3'ne, les aultres seigneurs et dames, donnèrent à Saintré, et Saintré à eulx, et diray du

194 l-E PETIT JEHAN DE SAINTRÉ

congié qu'il print, et des dons qui des ungs aux aultres furent faictz.