CHAPITRE L

Comment le seigneur de Loisselench et Saintrê vindrent es lices faire leurs armes a cheval, présent le roy, la royne et plusieurs princes, seigneurs et dames.

QUANT le XXX' jour fut venu après ce que Saintré eust osté l'emprise au seigneur de Loysselench, et jour ordonné de commencer leurs armes, le seigneur de Loysselench fist le matin, soubz le hourt du ro^-, porter vingt grosses lances, toutes armées, fors de fers, sans avantage, ainsi que en tel cas appartient. Et quant le roy, la royne, et tous les aultres seigneurs et dames furent sur les hours et par les fenestres de la grant rue Saint Anthoine à Paris, le seigneur de Loysselench par ung heraulx envoya ung coffret de cuir, tout plain de très biaulx fers de lances, dont ilz dévoient jouster, et donner la mesure telle qui luy plairroit. Et endementiers que les lances se ferroient à très belle et grande compaignie de seigneurs, chevaliers et escuyers françoys que le roy avait ordonnez, arriva le seigneur de

Loisselench, aussi les chevaliers et escuyers de sa compaignie, qui estoient plus de cent cinquante chevaulx, tous vestus de robbes neufves, apareillées, et devant luy cinq très biaulx destriers ; dont les quatre estoient houssez de paremens de veloux de diverses couleurs et de diverses façons d'orphaverie, et le cinquiesme estoit de veloux figuré au blazon de ses armes, chargé d'orphaverie, c'est assavoir : d'argent, à un beuf rampant de gueuUes, cornes et ongles de sable ; et sur chascun ung très bel et gent paige richement habillé. Et après ce destrier, venoit le conte d'Estampes, qui sur ung coupon de lance portoit son heaulme, sur lequel estoit ung demy beuf de gueuUes, entre deux penars d'argent, naissans d'ung carcoys de mesme et de gueulles. Et après luy, ledit seigneur de Loysselench, sur un très puissant destrier, armé de toutes ses armes, fors du chief, sur lequel il portoit ung très bel chappel de diverses violectes ; luy et son destrier, housse d'ung très riche veloux cramoisy, velousté et broché d'or sur or, tout fourré de fines martres sebelines; et, à sa dextre, venoit le duc de Berry qui, pour l'onneur et ordonnance du roy, comme estranger, l'acompaignoit. Et quant ilz furent arrivés à l'entrée des lices, le roy sans nulles serimonyes le fist entrer, et aller soubz l'ombr." d'un bien grant ciel de tapisserie, couvert

d'une bien grande couverture d'ung bout à aultre à annelets courans, où estoit le lieu et dressouer pour l'arriver, vin, fruiz et espices à planté, pour tous rafreschir. Et endémentiers qu'il estoit en l'ombre de son ciel, arriva Saintré, semblablement armé de toutes ses armes, excepté du chief qui couvert estoit d'ung très bel chappel de bievre, environné d'une très belle touaille de plaisance voilant, toute brodée et frangée de fin or; et au front estoit ung très riche afficquet d'ung très gros dyamant, environné de trois gros ballais et de trois grosses perles de quatre carats, que ma dame luy avoit tout ainsy donné ; luy et son destrier, tout housse de très fines harmines fourrées de martres sebelines, qu'il faisoit très bel à veoir. De ses six aultres destriers et de ses paiges très bien habillez, qui devant luy alloient, je m'en passe, car chascun le doit penser. Après ces six destriers, venoit le duc d'Alançon, qui tant l'aymoit que, sur ung tronçon de lance, son harnois de teste voult porter. Et après luy, venoit Saintré, et à dextre le duc d'Anjou et de Thouraine, qui tant le voulut honnorer. Et après eulx, sans nombre, chevaliers et escuyers qui le vouldrent accompaigner. Et quant il fut à l'entrée des lices, il fîst, comme bon chrestien, de sa baneroUe où nostre Dame estoit, un très grant signe de la croix, en disant la bene3'sson que madame

luy avoit apprinse ; et quant ma dame le veit, si lui sembla trop plus bel que oncques n'avoit faict ; dont, tant pour la grant amour qu'elle avoit à luy, comme pour le péril qu'il lui sembloit où elle l'avoit mis, tant se repentoit que peu à peu en celle grant douleur, estant au hourt avecques la royne, le cueur luy faillit. Et quant la royne et ses aultres dames la veirent pasmée, comme morte, car pas ne sçavoient son mal, pour non troubler le roi et sa compaignie, sans faire bruyt, arrouserent son viz et ses mains de vin aigre, et luy firent tous les remèdes qui se peurent trouver. Et tant bien fut frotée et secourue, que peu à peu elle revint à soy. Lors se print à ouvrir les yeulx, et regarder, puis çà, puis là, puis l'ung, puis l'aultre ; puis se print à parler, et dist : « Ha ! très benoiste Dame, vueillez moy reconforter. » Lors fut reconfortée. Mais pour prière que la royne luy fist, oncques pour lors, à veoir les armes ne se voult tourner.

L'acteur. — Saintré entrant dedens les lices, en soubzriant regarda les hourt du roy, et puis des dames, et en passant osta son chapellet tant humblement, et si bas qu'il peut, s'enclina ; mais de ce qu'il- ne vit madame, en fut aulcunement esprins. Toutesfois il se appensa bien que c'estoit, doubtant que ma dame n'eust cueur souffîsant à veoir ses armes, ainsi

que jà elle luy avoit dit. Lors, tout à cheval, entra dedens son grant ciel, ainsy courtine, paré et garny, comme l'autre estoit ; et avecques luy, messeigneurs le duc d'Anjou et le duc d'Alençon, et ceulx qui ordonnés y estoient pour le servir, sans plus.

L'acteur encores. — Et quant ilz furent tous deux venuz, et par la manière que j'ay dit, le roy, qui jà avoit ordonné la mesure des lances et fait toutes ferrer, ordonna qu'ilz fussent du tout armez, et que le seigneur de Loysselench, comme entrepreneur, fust sur les rencs le premier; et ainsi fut faict. Et après ordonna que Saintré venist, et que sur son harnois de teste portast son chapel de bievres et ainsi garny, comme sur son chief il le portoit. Et quant tous deux furent venus, le roy manda au seigneur de Loisselench, et luy envoya dix lances esgalles, par dix chevaliers, et qu'il en choisist les cinq. Le seigneur de Loysselench, comme saige et gracieulx chevalier qu'il estoit, remercia le roy très grandement, et puis les envoya à Saintré, qui choisist ainsi que en son emprinse estoit contenu. Saintré, pour abregier, l'en merc3a, et dist que les cinq plus grosses l'on retint. Lors ledit seigneur duc d'Anjou, qui le voult servir, en print l'une que sur sa cuysse luy mist jusques au départir. Et quant les dix lances furent baillées, le roy de par

Dieu les ordonna partir. Lors à ces paroles chascun brocha son destrier l'ung contre l'aultre, si qu'il sembloit que jamais à temps n'y peussent venir. Et à ceste course, le seigneur de Loysselench actaint Saintré sur la double du coude senestre, qui esclissa, et Saintré actaint au faulx du plastron ; et le coup fut ung peu bas, dont, en rompant sa lance par maints esclats, il ploya. Alors le cry des gens et des trompettes fut si grant que longue pièce dura. A la deuxiesme course, le seigneur de Loysselench ataint Saintré à la buffe, tellement que à bien peu ne l'endormit. Et Saintré l'ataint au fronc de son heaulme, et perça son beuf d'argent, tellement que au passer que les chevaulx firent, le sien tourna ce devant derrière ; et à ceste course Saintré ung peu se reposa. A la troisiesme course, tout ainsi que Saintré l'avoit actaint, il actaint Saintré, et lui emporta son chapel dessus la poincte de sa lance, tout ainsi garny comme il estoit ; et Saintré l'actaint ou hault de son grant gardebras, qu'il luy faulsa, avesques son double, et rompit les tresses, et le gardebras vola par terre. Et alors recommença le cry et bruyt des gens et trompettes, tellement qu'à peine les povoit on faire cesser. Et quant le seigneur de Loysselench fut ainsi desarmé, le roy voulut reveoir la lectre des armes, pour bien veoir comment elle contenoit ; si

trouva sur ce trois clauses, dont la première estoit que s'il advenoit, qu'en faisant lesdictes armes à cheval ou à pié, l'un d'eulx fust tellement exoinié que pour ce jour parfaire ne les peust, ou qu'il fust hors de ses arsons, ou de ses pieds porté par terre, ou qu'il fust de teste, de bras ou de corps, tellement desarmé qu'il refusast à parfaire lesdictes armes en tel estât, cestes et celles qui seroient à faire seroient tenues pour faictes; et sera tenu celluy de payer tous les pris, ainsi que se l'ung après l'autre il les avoit tous perdus. Et pour celle cause le roy fit cesser la jouxte, et au seigneur de Loysselench fist remonstrer le contenu de sa lectre par les quatre seigneurs d'Andach, de Nulz, de Morg et de Terg, barons pouUains, venuz en sa compaignie, ainsi que dit est, qui présent eulx fut leue ; les priant que de sa part les recordassent, et qu'il ne voulsist pas mectre son ame, son honneur, son corps et par adventure sa vie, en péril de mort. Le seigneur de Loysselench, qui ouyt les choses dessusdictes, remercia très humblement le roy ; mais, comme très desplaisant de son meschief, dist que advenist de luy ce que à Dieu plairoit, car vraiement il parferoit ses armes. Les seigneurs françois, que le roy luy avoit baillez pour le servir, ne l'en peurent destourner. Lors lesdits seigneurs pouliains luy dirent tout court, qu'ilz

ne le serviroient plus en tel estât. Alors le seigneur de Loysselench dist : «Vous voyez mieulx 'mon honneur et ma honte que moy, je les remets à vous et à voz mains. » Alors luy dirent que sur eulx ilz le prenoient, pour le très grant dangier où ilz le veoient, le confortant que aux armes à pié il se poroit bien recouvrer ; et lors, à très grant peine et douleur de son cueur, il le consentit. Laquelle nouvelle rapportée au roy, il les fist tous deux retraire, et de leurs chiefz desarmer, et puis tout à cheval venir devant luy, chascun garny du pris qu'il devoit donner. Quant la royne et les aultres dames virent que le seigneur de Loysselench estoit ainsy desarmé, accoururent toutes à ma dame, qui sur les quaiTeaulx d'or et de S03'e gisoit, faisant à Dieu et à nostre Dame de Liesse, à qui, comme dict est, l'avoit voué, prières et oraisons. La royne luy dist : « Hé ! Belle Cousine, levez vous sus, et venez veoir tant de belles choses ; et comment nostre bon filz Saintré a le Poullain desarmé, tant que monseigneur les a faict cesser et venir devers luy, je ne say pourquoy, fors que pour donner le pris. » Ma dame, qui de celle très désirée nouvelle fut sy joyeusement reconfortée que son cueur ne sçavoit où il estoit, faignoit aucunement que point ne lui en chailloit. Alors la royne luy dit : « Ha! ha! Belle Cousine, bien appercevons que vrayement

estes peu joyeuse de Thonneur que ce très vaillant escuyer a huy conquis, dont monseigneur et naoy y partons ; or sus, levez vous appertement. » Lors la prent par la maib, et les aultres dames par raultre,tant qu'elle fut levée et fut à la veue du hourt. Ma dame qui tant avoit sa joie renouvellée, embuschée du deul Eoubz l'ombre du parler que la royne luy avoit dict, covrant sa restorée maladie, à la royne dist : « Hé ! ma dame, comment est ce chevalier poullain ainsy desarmé ? » Alors la royne luy compta toutes les armes : et comment Saintré rompit sa première lance, comment il perça le beuf d'argent du chevalier, et le retourna ce devant derrière, et comment il l'avoit desarmé. En devisant ces choses, ma dame de joie ses yeulx mouvoir ne povoit de regarder Saintré ; et Saintré regardoit puis çà, puis là, et puis son regard tout à coup flechissoit sur elle. Alors ma dame luy fist son signal, auquel très gracieusement il respondit. Et quant ilz furent devant le roy, il leur fist dire par Montjoie,roy d'armes des François : « Monseigneur de Loysselench, et vous, Jehan de Saintré, le roy, mon souverain seigneur, cy présent, m'a commandé vous dire, l'ung et l'aultre, que tous deux avez sy haultement et honnorablement faictes voz armes du jour d'huy, qu'ilz ne sont hommes nulz qui mieulx les sceussent faire ; mais pour

vostre gardebras, monseigneur de Loysselench. du coup de lance desarmé, à vous, Jehan de Saintré, le roy, par le contenu de la lectre, vous adjuge de ces armes le pris, et à vous, monseigneur de Loysselench, que vous acquitiez, et veez cy de quoy. » Lors luy bailla le bel et riche dyamant du pris, que le roy avoit eu en garde. Lesquelles parolles dictes, par Brunsvich, le heraiilt venu avecques luy, furent de mot en mot données à entendre. Alors le seigneur de Loysselench s'enclina devers le roy, et en son poullain le remercia très humblement de l'honneur qu'il luy avoit fait, et dist que vrayement Saintré avoit loyaulment gaigné le pris. Et à ces paroles il print le d3'amant, et vers Saintré s'advança, et en son langaige très doulcement le remercya, et mist en sa main le dyamant. Et lors le roy ordonna que chascun s'en alla desarmer. Mais au départir l'ung de l'autre, en toutes façons, Saintré, per à per et à sa dextre, le convoya; alors trompettes, clarons et menestriers commencèrent à corner. Dont la joie fut tant grande par la ville qu'elle ne se poroit compter. Et à tant laisseray cy à parler d'eulx qui s'en vont desarmer, et puis soupper avecques le roy, qui grandement honnora ledict chevalier et sa compaignie ; et de Saintré, que la royne voult retenir avec elle à soupper, je parleray.

L'acteur. — Quant le souper fust prest, le roy envoya quérir le seigneur de Lo3'sselench et tous les aultres quatre barons, chevaliers et escuyers poullains ; alors Saintré s'en va les quérir très bien accompaigné. Et quant ilz furent devers le roy, on leur fist très bonne chiere et grant honneur ; lors les tables furent dressées, et le souper prest. Et le roy fist le seigneur de Loysselench seoir à sa dextre, et à sa senestre les aultres quatre barons ; et les aultres, à l'aultre première table après celle du roy; de vins, de viandes de diverses façons urent très bien servis, et ne les fault jà deviser, car chascun peult penser et sçavcir que ce fut haulte chose. Saintré, après ce qu'ilz furent tous servis, s'en va soupper avec la royne, ainsi qu'elle luy avoit dit. Des bonnes chieres que ma dame et les aultres dames et damoiselles luy firent, ne fault point demander; car il n'y avoit celle qui s'en peust cesser. Ma dame, qui sur toutes les aultres estoit celle qui plus legierement s'en passoit, toutesfois ne se peut tenir de regarder ce bel dyamant du pris, qu'il portoit à son col à une chaîne d'or ; alors la royne aussi le voulut veoir, et plusieurs aultres dames et damoiselles. Lors ma dame luy dist : « Certes, Saintré, la dame est bien heureuse qui l'a gaigné. » Lors la royne qui oy ces paroUes, luy dist : « Je prie à Dieu, Sain-

tré, que, de bien en mieulx, puissez vous tous les aultres pris gaigner. » Lors à genoulx leur dist : « Ha 1 mes dames, vostre bonne raercy ; mais je ne l'ay pas à Dieu desservy, et ce qui en est me vient de luy par voz bonnes prières. » A ces parolles, le maistre d'hostel vint, qui fist laver la royne, et quant elle fust assise, malgré que Saintré en eust, elle le fist seoir à sa dextre. Que vous dirois-je? La joye y fut telle, d'ung costé et d'aultre, qu'elle ne se poroit conter. Mais quant les tables furent levées, le roy d'ung costé, et la royne de l'aultre, s'en vont en la grant salle, pour veoir les dances et morisques de diverses façons ; mais pour les affaires que le seigneur de Loysselench avoit eu ce jour, et aussi Saintré de son cousté, le roy hasta les espices et le vin de congié ; puis se retrahit en sa chambre, et chascun print congié. Saintré et tous les aultres, chascun prend son escuier ou chevalier soubz le bras, et aultre belle compaignie, menèrent Loysselench et les aultres, en son hostel. Et cy laisseray à parler des honneurs, vins et viandes que tous les jours leur envoyoit, et du jour des affaires pour les armes à pié ; et diray de ma dame et de Saintré, et de la parfaicte joye que, celle nuyct, ils firent au preau.

L'actei'k. — Celle nuyct, ainsi que ma

LE PETIT JEHAN- DE SAIKTkÉ 251

dame avoit à Saintré son signal donné, ilz se trouvèrent au preau ensemble; alors furent les baisiers à grant largesse donnez, et les baisiers renduz. Que vous dirois-je ? Telz que oncques ne pensèrent estre à si parfaictz plaisirs. Et lors ma dame luy dist : « Helas ! mon cueur, helas! ma joye, helas! mon seul et souverain désir, je veiz huy l'heure que jamais ne vous cuydoie veoir vif; et quand je vous veiz entrer es lices, de la grant paour que de vous j'euz, le cueur me amortist tellement que je, comme morte, cheuz ; et se je n'eusse esté tost secourue, vrayement je rendoye mon esprit; mais quant je ouys de vous les vertueuses nouvelles, incontinent mon cueur se revesquit ; et ma dame, avec les aultres dames, me vindrent sourdre, et à la veue du hourt avecques elles me firent venir. — Helas! très haulte et excellente dame, que me dictes vous .' Las ! se je l'eusse sceu, qu'eust fait mon très doloreux cueur.? Pour lors, trop mieulx m'eust valu la mort que la vie ; je feusse demouré, de mes arme^ à faire, à grant deshonneur ; mais loué soit Dieu et gracié que je n'en ay riens sceu! Lors que jentray es lices, je vous vy de lez la royne ; mais quant je vins tout armé sur les rencs, je vy la royne et toutes les aultres dames, fors que vous ; SI me pensay que n'aviez cueur de veoir l'esbatement de la jouste, ainsy que jà m'aviez

dit, et ne pensay en vostre mal plus avant. Ores, ma très redoubtée dame, loué soit Dieu et nostre Dame, de l'honneur que j'ay aujourd'huy eu par vous, en espérant, ma dame, de bien en mieulx. Si vous supplj'e que faictes bonne chiere, et du surplus ne vous souciez ; car Dieu, qui a esté à noz armes, sera aux aultres. » Et à ces parolles prindrent, l'ung de l'aultre, son très gracieulx congié, et cy laisseray à parler de leurs affaires, et diray des armes à pié, et comment elles furent faictes.