CHAPITRE XLIX
Comment ma dame se complaint a Saintri, et les doulces parolles qu'elle luy dit.
MA dame, qui encores n'avoit veu le chevalier que au lever les cercles, quant elle le vit si hault et corpulant, fut moult esbahye, et se repentit des parolles qu'elle avoit dictes à Saintré, que oncques puis ne fut joyeuse ; mais puis que la chose estolt si avant, aultre conseil ne se povoit prendre ; dont, jour et nuyct, ne cessoit de plaindre et de souspirer, et en ses plains disoit : « Helas! moy dolante, et que as tu faict? Et que pensoyes tu quant tu conseillas et mis en voj^e de telz perilz celluy que en ce monde plus aymoye, et que sur tous et toutes l'en devoye
2l6 LE PETIT JEHAN DE SAINTRÉ
desmouvoir ? Helas ! il aura à faire à ung si grant homme, si fort et si puissant, qu'il n'est nul qui doubter ne le doye ; dont s'aulcun meschief du corps ou de son honneur luy en advenoit, ce que Dieu ne vueillel lasse! dolante, maleureuse, jamais mon cueur ne auroit joye. Et qui pis est, luy par advanture jamais ne te aymeroit; et vrayement il auroit droit; combien que à ce je l'aye conforté, seullement pour estre entre les bons et les preux chevaliers renommez. Et, de ce, mon vray Dieu, je t'en appelle à tesmoing, et aussi ta benoiste mère, à laquelle je le voue de cire armé de son harnois, de son destrier, et housse de ses armes, tout pesant trois mille livres ; à genoulx et à mains jointes, Vierge, toy suppliant que en honneur et en corps le me vueillez rendre et sauver ; et du surplus adviengne ce que poral » Et quant ma dame eut finées ces parolles, elle vint oti la royne estoit, si ne tarda gueres qu'elle apperceut Saintré ; lors print son espingle, et son signal luy fist. Saintré qui, de l'aultre part, moult desiroit parler à elle, incontinent luy respondit. Et quant la nuyct fut venue, et l'heure aussi, et qu'ilz furent ensemble, ma dame, qui le vit sy très joyeulx, lors son cueur changea pourpos, et se mist de très grant dueil en très grant joye, et lors luy dist : « Or, mon amy, pensez de
bien faire, et vertueusement perdez ou gaignez honnorablement ; car quoy que de vous adviengne à ung tel et sy puissant homme, vous n'y povez avoir que honneur ; et ne doublez la grandeur, ne la force de ce géant, au regard de vous ; car Dieu est par dessus tous, et ayde à ses amys qui en ont besoing; et luy requerent dévotement ; et la raison est ceste : car les plus forts mesprisent les plus foibles et combatent en orgueil, et les foibles requièrent l'ayde de Dieu, qui les conforte et est pour eulx ; dont d'omme à femme, de povoir à povoir, nul que Dieu n'en est certain. Et ceulx qui sont de povoir et de nombre esgal, et qui tous de bon cueur requièrent l'ayde de Dieu, l'ung contre l'aultre, se garde bien qui aura tort ; car Dieu est le vray juge, et rend à chascun son droit. Doncques, mon amy, adviengne de vous ce que à Dieu plaira; se il en donne aucun peu d'honneur d'ung aultre, et s'il vous surmonte, comme ung géant qu'il est au regard de vous,, il ne peult tant vous fouller que le monde ne vous en prise trop mieulx, que se n'aviez eu affaire à luy; car j'ay aux preux des armes ouy conter, que le gentil homme sans querelle, foullé en armes, est plus prisié qu'il n'estoit devant ; car les gens combatent, et Dieu donne les victoires à ceulx qu'il luy plaist ; dont, mon amy, ne vous souciez que de bien faire. Et,
2l8 LE PETIT JEHAN DE SAINTRÉ
quant au regard de vostre despence, et de vous habiller honorablement, veez cy en ce saichet six mille escuz, et les despendez honnorablement, et à Dieu soyez! »
L'acteur. — Saintré, qui voit l'amour de ma dame envers luy fleurir tous les jours, tant humblement qu'il peut et sent, l'en remercia ; dont, pour abregier, print d'elle congié, et toute nuyct eut tant de joye que, de ce nouvel pensement, il ne dormit. Et quant le jour fut venu, ouye la messe et dictes ses heures, de besongnier il ne cessa, et tant que, à l'ayde de Dieu, du roy, de ma dame, il fut d'armes, de destriers, de très riches paremens et d'aultres habillemens sy bien en point; que vous dirois je? ce qu'il eut, bien eust suffi à ung baron royal. Et à tant laisseray cy à parler de toutes ces choses, et du grant bruit qui partout estoit de ses armes, et de la prière que chascun faisoit pour luy, qui tant estoit jeune et menu homme au regard de ce chevalier poullain, que il sembloit à chascun que, tous les coups, il le foulleroit ; or diray je des armes faictes au terme et jour ordonné.
