CHAPITRE LU

Comment le roy ordonna que les pris fussent donnés.

LE roy, qui garny estoit de huit joyaulx sufïisans, qui estaient le prix, quatre des ungs, quatre des aultres, pour les donner à celluy à qui il appartiendroit, ordonna

audict Monjoie, roy d'armes des François, qui sur le hourt estoit, qu'il portast les paroles toutes telles qui s'ensuivent. Lors par un ung Hérault fut à haulte voix crié : « Silence de par le roy, >■> affin que chascun le puist ouyr. Lors dit Montjoye : « Messeigneurs de Loysselench, et vous, Jehan de Saintré, le roy nostre souverain seigneur, qui cy est, m'a commandé et ordonné de vous dire que de ces voz dernières armes, tous deux, avez bien et vaillamment faict ; mais puis que vous, monseigneur de Loysselench, ne vous sentez aisé pour les accomplir, selon le contenu de voz lectres d'armes, luy, comme vostre juge, seul et competant, vous ordonne que vous acquitez de voz quatre pris ; lesquelz, de son commandement, congié et licence, je vous rens. » Et quant le seigneur de Loysselench vit Montjoye qui eut finées ses parolles, demanda qu'il avoit dit, lesquelles à luy declairées furent ; et bien ouye la sentence du roy, de laquelle il ne pensoit pas moins, à genoulx dist très humblement qu'il remercioit le roy, et bien se doulloit de sa maie aventure, qui, tant à pié comme à cheval, n'avoit laissé ses armes parfaire, pour le plaisir des dames plus longuement durer ; mais puisque ainsy fortune le vouloit, il estoit prest de soy acquiter, ainsi qu'il ordonneroit et que raison le voulloit. Et ces parolles dictes,

Montjoye descendit, qui, pour soy acquitter, luy bailla ses quatre joyaulx ; et quant il les eut prins, à Saintré s'avança pour les bailler. Lors son cueur fut tellement estrainct, qu'il ne peut ung seul mot parler. Les aultres quatre barons poullains congneurent bien son grant dueil ; et à ce, chascun, qui mieulx le sceut dire, s'efforcèrent de l'excuser. Alors Saintré, que monseigneur d'Anjou conduysoit, s'avança en soy inclinant, pour les quatre joyaulx prendre, puis en soubzriant luy dist : « Monseigneur mon frère, de l'honneur qu'il vous a pieu me faire, je vous remercie, tant comme je puis et sçay. » Alors trompettes et clairons commencèrent à sonner, et par telle façon que à paine les povoit on faire cesser. Et ces choses faictes, le roy ordonna en leurs pavillons eulx retraire, et puis à cheval monter pour aller en leur logeis desarmer. Et quant Saintré fut sur son cheval monté, mon dit seigneur d'Anjou luy dist : « Nous voulons, Saintré, que vous soyez honnorable et gracieulx. » Lors le mena au seigneur de Loysselench, qui jà sur son destrier estoit monté. Lors les assembla tous deux, puis luy et monseigneur de Berry se misrent devant, et ainsi jusques à son logis, le conduyrent. Des honneurs, des prières l'ung de l'aultre, je me veux passer, et des choses que depuis firent

jusques à l'heure du soupper ; et diray des grans joyes et devises que la royne, ma dame et les aultres dames et damoyselles firent, et aussi du roy et de toute la court, et aussi par toute la ville, tout ce jour et celle nuyct, qu'il n'estoit celluy ne celle qui taire se peust de louer Saintré.