CHAPITRE LVIII
Comment la dame requist a Saintré d'aller en Prusse contre les Sarrazins; et comment il luy promist d'y aller, et le fist le roy chief de cinq cens lances.
L'acteur E^xoRES. — Advint que celle mesme année le voyage de Prusse se tint. Alors madame luy dist : « Mon seul désir et toute ma pensée, tant est l'amour saine et entière que j'ay en vous, pour vous faire le meilleur et le plus vaillant du monde que vrayement elle estaint de mon cueur la doubteuse crainte que j'ay et doibz avoir de vous, mais pour ceste fois seullement et non plus, vous y vueil advanturer ; par armes que vous ayez faictes à la requeste de monseigneur le roy et aultres n'avez volu estre chevalier, vous excusant que jamais ne le seriez, se ce n'estoit contre les Sarrazins, et soubz la baniere de mondict seigneur, dont vouldroye bien que luy eussiez
faict ce plaisir; dont par ainsi, voz biens en armes vous y seroient comptez. Mais d'une chose me resconforte, que nul bien fait ne fut oncques perdu ; et pour ce, me suis appensée que vrayement il vous fault estre comme voz prédécesseurs ont esté ; et pour ce faire, il me semble que plus sainctement et honnorablement ne le povez estre que à ce très puissant voyage de Prusse, à celle très sainte bataille qui doit estre à rencontre des Sarrazins ; nous voulons que vous y aillez, en grant estât, à l'honneur de monseigneur qui vous aydera, et aussi ferons nous. » Quant Saintré entend ce très noble et hault vouloir de ma dame, incontinent à genoulx se mist et luy dist : « Ha ! ma très noble et souveraine déesse, celle qui me peut et doit plus commander, et celle à qui je vueil et doy plus obeyr que à tout le demeurant du monde, tant et si humblement que je puis, de vostre bon voloir, conseil et commandement, à joinctes mains vous remercye; auquel vostre voloir, à l'ayde de Dieu, de nostre Dame et de la saincte vraye croix, je obeyray et accompliray de très bon cueur, espérant, en leur saincte mercy, que vous en aurez nouvelles telles que vous desirez. » £t ces paroUes finées, quoyque fust du surplus, il print congié d'elle. Alors s'en va au roy, auquel, jour et nuyct, ne cessa de faire ses prières, tant qu'il eut congié. Le
roy, qui, comme vous ay dict, plus que nul aultre, hormis les seigneurs de son sang, le aymoit, luy donna de ses finances largement ; et oultre ce, tant le voult honnorer que, pour le service de Dieu et de saincte religion et foy chrestienne, à ce très sainct passage de Prusse qui hastivement contre les Sarrazins se faisoit, le vault faire chief de cinq cens lances, tous nobles hommes, et trois mille hommes de traict, sans les seigneurs qui alloient à leurs despens, qui furent plus de deux cens lances avecques le traict; et pour accompaigner sa baniere, ordonna que des douze marches de son royaulme en yroient cinquante ; dont la nouvelle par tout respandit, tant par son royaulme que dehors, et les seigneurs et les nobles vindrent qui se présentèrent ; desquels le roy, contrainct à grans prières, en accorda tant qu'ilz furent cent et soixante banieres, desquelles il donna, comme dit est, la charge à Saintré. Et quant Saintré, qui excuser ne se peut, en eut très humblement remercyé le roy, il assembla à part tous les seigneurs, et puis en riant leur dist : « Messeigneurs, vous avez veu comment le roy de sa grâce, pour quelconque excusation que j'aye faicte, a voulu moy tant honnorer que de moy donner ceste si grant charge, qui souffiroit bien à ung des seigneurs royaulx, et a faict de moy, ainsi que dit ung petit moyne, dont l'histoire
dit ainsi : Il fut jadis ung seigneur, qui, tout housé et esperonné, à toute sa gent va en une abbaye pour ouyr messe, qui près de son logeis estoit. Et quant la messe fut dicte, illec furent cinq ou six des plus petits enfans de celle église, moyneaulx qui desboucloient ses espérons. Lors qu'il se vit de telz gens assailly par les deux pies, il demanda que c'estoit ? Ses gens, en riant, luy dirent : « La coustume de toutes celles églises est de rachapter des novisses les espérons que l'on porte aux cueurs. » Lors leur fist bailler ung escu ; puis appella le plus jeune et innocent de tous, et luy dist : « Je vueil sçavoir lequel est le plus saige de vous tous ? » Adonc l'enfant, sans plus penser, luy dist : « Monseigneur, celuy que damp Abbez veult. » Laquelle responce moult fut notée. Dont par ainsi se peut dire de moy, car combien que je soye le plus simple de vous, toutes fois par celle raison il faut que je soye le plus saige, puisque le roy le veult. » De laquelle plaisant nouvelle, tous se prindrent à rire, et dirent que le roy sçavoit bien qu'il faisoit. Dont pour obeyr, et pour amour de luy qui le vouloit, tous furent lyez et contens. Et à tant laysseray cy à parler de ces choses, et diray des seigneurs, barons et banieres qui y furent, dont les blasons s'ensuyvent.
S'ensuyvent les noms des princes et seigneurs qui furent contre les Sarrazins en Prusse. Et premièrement ceulx de la marche de l'Isle de France.
Le seigneur de Montmorency, qui porte d'or à une croix de gueuUes, à cinq aygletes d'azur, et crye : Dieu ayde au premier chrestien. Le seigneur de Trie, qui porte d'or à une bande d'azur, et crye : Boulongne. Le seigneur de Rosny, d'or à deux faisses de gueuUes^ et crye : Rosnj'. Le seigneur de Forest, de gueulles à six merlectes d'argent. Le seigneur de Viez Pont, qui porte d'argent à dix anneaulx de gueulles. Le vidame de Chartres, d'or à trois faisses de sable, à ung orle de six merlectes de mesmes, et crye : Merlo. Le seigneur de Beaumont, geronné de douze pièces d'argent et de gueulles. Le seigneur de Sainct Brison, d'azur à fleurs de lis d'argent. Le Boutellier, escartellé d'or et de gueulles, et crye : Les Granges. Le seigneur de Marolles, bandé de sept pièces d'argent et de gueulles.
