CV COMMEN'CE LA BATAILLE

ET quant les ungs dee aultres furent approchés, ainsi comme le trait d'ung arc, le Turcq fist sa bataille arrester, pour veoir l'ordonnance des Chrestiens, et pour tenir eulx tous et leurs chevaulx en alaine; mais quant il vit

que l'avant garde ne bougeoit ou mouvoit, et que le grant traict des canons et coulevrines, des arcs et arbalestres des deux esles, grandement les dommageoient, lors se pensa de rompre son repos, et manda faire deux pars de ses gens à pié, qui derrière luy estoient, et que chascune part courust sus aux batailles des gens de traict; mais quant ilz se sentirent et furent du traict si merveilleusement touchez, n'y eut celluy qui osast approcher, et qui ne recullast. Alors le Turcq, comme désespéré, fist avancer ses bannières, et tant que chevaulx peurent aller, les ungs parmy les aultres, eulx escriant, viennent vers l'avant garde ; lors les nobles François cryerent à haulte voix : « Jhesus, nostre Dame, Montjoye, sainct Denys! » La bannière du roy et toutes les aultres là furent, et tant que destriers peurent aller, les ungs parmy les aultres s'entrefierent, tellement que le seigneur de Saintré, qui, sur son très puissant destrier, armé estoit, tous deux très richement housses d'orfaverie esmaillée de ses armes, et sur son bacinet une très riche houppe, par sus tous moult apparant, comme à Dieu pleut, actaint de sa lance le Turcq par l'estroict de sa visière, si que il luy mist tout le fer dedans ; et, à l'empraindre que il fist, le renversa tout mort à terre. Lors commença la bataille très dure et forte, car gueres d'eulx

encores ne sçavoient la mort ' de leur seigneur ; lors veissiez gens et chevaulx cheoir et tresbuscher les ungs sur les aultres, et de toutes pars cryer, que c'estoit merveilleuse chose. Mais quant le seigneur de Saintré se yit de'sgarny de sa lance, incontinent met la main à l'espée, et fiert à dextre et à senestre, qu'il n'y avoit Turcq qui place ne luy fist ; et quant il volt joindre à la bannière, lors fut de toutes pars assailly, que, se ne fut l'ayde de Dieu, et qu'il fut bien tost secouru, sans nul remède il estoit mort ; mais la bannière du roy, qui par tout le suyvoit, à l'ayde des bons et vaillans François et des aultres qui la conduysoient et faisoient de merveilleuses armes, donnèrent de fors affaires aux ennemys. Et de les nommer seroit trop longue chose, et de declairer leurs proesses ; et aussi qui ne feroit declaracion des armes des ungs comme des aultres, en pourroit estre en malle grâce ; pourquoy, je prie à tous que à tant leur vueille seuffire, et soye tenu pour excusé; mais du seigneur de Saintré, duquel l'istoire parle par exprès, me convient plus avant procéder. Quand le seigneur de Saintré fut ainsi délivré, alors brocha son destrier des espérons, et vint au Turcq qui tenoit la bannière, et luy donna si grant coup sur le bras de son espée, si qu'il en fist la bannière cheoir à terre ; les aultres Turcs qui actendoient, en

combatant, leurs secours, se deffendoient comme les plus vaillans d'eulx tous. Et endementiers que ceste si fiere bataille se faisoit, les deux Souldans s'approchèrent ; mais quant ilz rirent la bannière du grant Turc à terre, se arresterent pour prendre conseil quel party ilz prendroient, et quelle chose ilz feroient. Les Turcs, qui ne se peurent plus porter, ne la charge soustenir, tant à cheval comme à pié, se rompirent. Alors, tant que chevaulx peurent aller, les deux Souldans à grant haste envoyèrent faire haster la tierce bataille pour les venir secourir; et à ce coup fut heur que pour conforter, ayder et secourir l'avant garde de noz gens qui lassez et travaillez estoient, le roy de Behaigne et sa bataille qui faisoit une des esles, et le duc de Lectonem qui faisoit l'aultre esle d'autre part, les vindrent tellement hurter, que tous passèrent jusques aux bannières, dont l'une fut portée et gectée par terre; et quant leur bataille de pié, qui après eulx venoit, apperceut la bannière de leur seigneur à terre, n'y eut celluy qui osast passer plus avant. Et quant la troysiesme bataille, que conduysoient les roys de la grant Arménie, de Sep, de Maroch et de Aliapie, et le seigneur de Vallaquie, virent les aultres deux batailles desconfites, et que encores n'avoient assemblé à la grant bataille l'arriére garde, ne les deux

esles des gens de pié, furent tous esbahis ; toutesfois pour ce que venus estoient pour combattre, et estoient de gens à cheval et à pié si très puissans, conclurent que le plus tost qu'ilz pourroient fussent assemblez. Et quant la,grant bataille des Chrestiens virent la dernière bataille des Turcs approcher, lors les princes qui la gouvernoient, et qui n'avoient encores veu qu'il leur fust, ou eust esté besoing d'assembler, mandèrent à l'arriére garde que quant ilz les verroient assemblez, que hastivement s'approchassent pour ferir du cousté ; car, en ce grant plain, n'avoient boys ne vallées où gens se peussent embuscher ; laquelle chose et ordonnance fut bien tenue, et sur ces parolles furent tous assemblez. Là fut la très fïere, cruelle et mortelle bataille qui eust fait du mal assez; mais l'arriére garde, au cry de nostre Dame et du ro}' de Honguerie, c'est assavoir Lancelot, tant qu'ilz peurent courre les lances couchées sur les arrests, frappèrent au travers ; et les deux esles du traict ferirent sur eulx d'autre part. Et incontinent qu'ilz sentirent le traict, se rompirent et mirent en fuyte ; alors fut la mortalité si grande, sans plus de deffence, comme se fust de brebis. Mais la bataille des gens à cheval dura très longuement, et eust eu assez plus de dure'e pour le grant nombre qu'ilz estoient, se l'arriére garde ne se fust

avancée, qui fut cause de leur desconfiture plus briefve ; et à ce coup furent leurs bannières portées par terre et desconfites, et le surplus de ceulx qui s'en peurent eschapper par la grâce de Dieu, mis à la fuytte. Là fut d'eulx l'occision si grande que, paravant ne oncques puis la bataille de Pharsale, où Pompée fut desconfit, ne fut faicte la semblable. Et là furent morts l'empereur de Cartaige, les deux Souldans de Babillonne et de Mabaloch, le grant Turcq Bazul, le seigneur de Valaquie, les roys de Maroch et de Alapie prinz, et tant d'aultres grans seigneurs prinz et mortz, que, pour abréger, je m'en passe ; dont dura la bataille plus de six heures, et pour la nuyct qui survint, fut besoing à noz gens de retraire, et d'eulx loger sur les mara3-s d'ung estang et à l'entrée d'un boys ; et là se rafîrechirent et reposèrent eulx et leurs chevaulx, qui moult laz et travaillez estoient, et medecinerent les personnes et chevaulx blessez, jusques au lendemain bien matin qu'on alla visiter et recongnoistre les trespassez. Et quant furent sur la place, trouvèrent entre les morz maints Sarrazins, navrez et feruz, qui tendoient les mains pour eulx rendre, mais tous furent mis et rendus à mort. Et lors tirèrent tous les Chrestiens qui furent cogneus aux croix qu'ilz portoient de diverses couleurs ; et

ceulx qui n'estoient morz, furent prins et menés en l'ost, et puis es bonnes villes pour les guérir ; et les morz à très grans honneurs et solempnels services de Dieu furent enterrez; et, par sur tous, les Françoys furent exemple des aultres, car tous se vestirent de noir, et par celle amour qu'ilz monstrerent porter l'ung à l'autre, furent de tous très grandement louez.