Chapitre IX

Le jour venu, en peu d'heures, devant le palais du R07 Rodilardus, furent assemblez bien vingt mille combattans, tant Rats que Souris, gens bien experts à la guerre et aux armes duictes; lesquels, après qu'ils furent tous enroolez par le commandement du roy, commencèrent à soy armer. Premièrement, ils mirent en leurs testes, en lieu de heaumes, coquilles de noix bien dures et asserées, et vestirent cuirasses faites de pelleures de febves, pour la seureté de leurs rains. Leurs espieux et lances furent faites de chaume qu'ils prindrent sur les prochaines maisons ; les espées estoient d'une herbe appellée glaux; les targes et escus estoient de corne de lanterne. Mais le roy magnanime Rodilardus endossa un hauberion de grand valeur, fait de la peau d'un horrible chat, lequel chat, en son vivant, avoit esté garde et secretain du temple de la déesse Pallas. Son office estoit d'expulser hors les rats qui y faisoient mille outrages ; mais bien souvent il en mettoit à mort plusieurs, quand ils entroient an temple sans son congé, pour les-