INÉDITES

de N.-C. FABRI DE PEIRESC d CHARLES DE L'ESCLUSE

Monsieur, quattre ou cinq jours avant mon despart de Provence je receus la vostre du 12 May, et fus bien aise d’entendre que la derniere boette que je vous avois envoyé estoit arrivée à bon port et qu’elle vous avoit esté agreable. J’escrivis incontinent à Frejus, à Thollon, à Mompelier, en Avignon et encor ailleurs, et priay tres instemment des amys que j'y ay partout de me recueillir toutes les semences que vous desirez. Je fus en mesme temps à Marseille et y laissay

la mesme charge à quelqu’aultre ; tellement que j'espere qu'entre touts on aura tout ce que vous desirez : mais à grand peine se pourra il rien envoyer vers vous avant la foire de Pasques, avant lequel temps j'espere estre de retour en Provence. Et quand cela ne seroit, mon frere recevra le tout de toutes pars, et me l’adressera en ceste ville afin que je le vous puisse faire tenir par les marchands qui iront à la foire. Estant à Marseille je me laissay porter à ma curiosité : jusqu’au lieu où se treuve quantité de Tragacantha où en ayant diligemment esplusché beaucoup de plantes enfin j'en recueillis la semence que je vous envoye maintenant. Je vous en envoyeray dadvantaige lorsque je seray de retour en Provence. On m'a promis à Aix de me faire avoir des bulbes du Narcissus totus albus qui croist es montaignes voisines. Mais il fauldra attendre l’année prochaine afin que voyant la fleur on en puisse marquer les plantes pour les arracher au mois d’Aoust, aultrement on ne les sçauroit distinguer des aultres qui sont presque semblables. Passant par Lyon, je voulus sçavoir de Mr Vincent marchand libraire, qu’estoit devenüe la premiere boëtte que je vous envoyay il y a un an et demy, pour laquelle il m’a faict payer deux escus de port de Lyon à Francfort, et toutefois vous ne me marquez poinct de l'avoir receüe. Il me respondit qu'elle avoit esté seurement consignée entre les mains de messieurs les Raphelenges à Francfort, et qu'il m'en fairoit voir le memoire du chargement. Je suis bien esbahi que ne l’ayez receüe, et en suis marry

pour le dessein du puys artificiel de Mompelier et pour tout plein d’aultres curiositez que j'y avois encloses. J’ay veu le livre des Anneaulx antiques du s' Abr. Gorlaeus, et y ay prins plaisir : mais parce quéil promet des aultres recueils de medailles et aultres antiquitez, je desirerois bien de sçavoir dans coribien de temps, à peu pres, il espere de les mettre en lumiere et nommement ce qui concerne les medailles grecques, desquelles j'ay recueilly grand nombre en mon voyage d'Italie. Vous m’obligerez beaucoup de m'en donner quelque particuliere information mais nommement de la capacité, humeur et complexion de l'autheur, parce que, si c’est un homme accostable, je desirerois avoir sa cognoisçance, pour conferer quelque fois quelqu’une de mes medailles avec les siennes pour nous servir d'entretien. Je n'ay pas encores veu M le presidant du Thou pour sçavoir par quel chemin se sont perdües les lettres que je luy avois recommandé pour vous envoyer. J'espere de ne m'arrester pas en ceste ville plus haut de deux ou trois mois tout au plus. Cependant vous pourrez laisser l'adresse de messieurs les Bonvisi de Lyon pour la reprendre quand je seray hors de Paris, et faire vos faulces couvertes € à Mr Hadrian Beys, Marchand Libraire à la rue St Jacques, à l'enseigne de la rose blanche » lequel me les faira tenir chez moy seurement. Quant aux vers qu’on avoit desiré en louange de Mr Pinelli, j'eusse creu que Mr H. Grottius ou quelqu'un de ces aultres messieurs qui l’ont cogneu, en eussent faict apres sa mort et particulierement Mr Scaliger : mais je

serois marry d’avoir importuné personne. Il me reste à vous r'amentavoir que je seray à jamais

Monsieur

Vostre tres affectionné serviteur N.-C. DE PEIRETS

De Paris ce 25 Aoust 1605.

De la main de Charles de l'Escluse :

N.-C. DE PEIRETS Paris le 25 Aoust à celle du 12 May Receu en Leyden le 3 Novembre Respondu le 12

Adresse :

À Monsieur Monsieur de l’Escluse

à Leyden en Hollande.

Monsieur, je suis marry que les plantes du Tragacantha et Tartonraire que je vous avois envoyé dans la premiere boitte ne vous ayent esté rendües que si tard, que elles estoyent desja toutes flestries : et suis toutefois bien aise que vous les ayiez receües quand ce ne seroit pour autre chose que pour vous servir de tesmoignage de ma diligence et du desir que j'avois eu d’executer voz commandements. Que si cela n’est bien reusci, ce n’est poinct par ma faulte, car j y avois assez bien pourveu s’il me sembloit, et avois enveloppé cez racines dans de l’argille si fraische, que si la boitte fust allée par son droit chemin, c’est sans doubte qu’elles ne se seroyent pas sitost sechées et que vous les auriez eu toutes vives, mesmes attendu la charge que j’avois donné au messagier qui s’en chargea jusqu’à Lion, d'envelopper souvent la boitte dans un drappeau mouillé. Des aultres plantes que vous aviez desiré depuis, je

crains bien que mon absence de Provence ne soit cause qu'il en manque quelqu'une que nous aurions possible recouvré : maïs j’ay tant recom-

mandé cest affaire à mon frere, que je m’asseure

que nous en aurons la plus grande partie. Je lui ay escrit de me les envoyer icy, afin que je les vous puisse faire tenir par les libraires qui s’en iront à Francfort ceste foire de Pasques. Je les attends au premier jour. Et vous remercie par advance de tout mon cœur, du livre qu’il vous plait me promettre de voz Exotiques en grand papier, lequel attendant, je n’ay pas laissé d’en acheptericy un des communs pour m'y entretenir, comme j'ay fait fort souvent, et avec beaucoup de contentement. Mais à vous dire la vérité, j'ay esté bien estonné de voir que voz mariniers Hollandois qui vont si librement par toutes les Indes, se

soyent si mal acquittez deleur devoir envers vous, et qu'ils ne vous ayent apporté plus grand nombre

de curiositez, et notamment qu'ils n’ayent esté plus soigneux de vous apporter non seulement les semences ou fruicts, mais les branches mesmes de la pluspart des plantes où ils se cueillent. Je croyois que les nostres ne nous sceussent rien apporter qui ne vous fust commun : et c’est au contraire. Car je vois bien maintenant que je vous eusse peu envoyer tout plein de brouilleries que vous eussiez peut estre veu volontiers. Entr’autres choses pour ceste petite Noix qui est peinte au livre 2, chap. 26 num 2 j'ay un gros bouquet en forme d’espi pailleux et espineux, où il y a cinq ou six de cez Noixsettes lesquelles je n’eusse

jamais creu devoir croistre en ceste sorte ; veu

la dureté de leur noyeau. On me l’apporta de la Guinée d'Afrique et me racontoit on des merveilles de l'arbre qui porte ce fruict et de ses usages. On m’apporta en mesme temps deux grands fruicts de Baobab de ce païs là lesquels avoient la poulpe fort rougeastre à la mode des melons, ce qui s'accorde aucunement à ce qu'en dit l’Alpinus. J'en fis semer plusieurs graines, dont il n’en sortit que deux seulles qui avoyent desja fait des feuilles comme celles de l’'Oranger, mais excessivement grandes ; on les laissa mourir dans peu de temps à mon grand regret. Quant à vostre Cancer Mollucanus, M: de Mons (qui a la commission d'occuper le païs de Canada) en a apporté un de Lacadie, avec un Aiïllan tout vif, un de voz oyseaux Ourissia (lequel oultre son aultre nom est aucunement divers du vostre) et mille aultres raretez : mais il dit que ceste Escrivice a la coquille vuide et qu’elle est neantmoins pleine de chair fort delicate à manger et raconte mille aultres belles choses de ce païs là. L'Ichneumon de vostre Bellonius est assez bien descript verbalement, mais le portraict n’en est pas fait bien au naturel ; car il yen a un au Louvre qui se nourrit privement dans la propre chambre du Roy, lequel convient du tout à ce qu'en escrivent touts les anciens mais non pas au portraict de Bellonius. Je croys aussy qu’il aye aulcunement failly au portrait de Scaurus, car j'en ay un que feu mons. G. Vincenzo Pinelli avoit envoyé querir en Candie, lequel n’est pas semblable à celui-cy, particulièrement pour l’endroict de la bouche et des dents, en quoyilest plus approchant

de la description des anciens. Or il est meshuy temps de clore ceste lettre. Servez-vous de moy je

vous supplie, monsieur, et me tenez s'il vous plaict tousjours pour

Vostre plus affectionné serviteur