CCXXXII

LI amiraill chevalchet par cez oz.

Sis filz le siut, ki mult ad grant le cors. Li reis Torleus e li reis Dapamort .XXX. escheles establissent mult tost.

Chevalers unt a merveillus esforz :

En la menur .L. mille en out.

3220 La premere est de cels de Butentrot,

E l'altre après de Micenes as chefs gros ; Sur les eschines qu'il unt en mi les dos Cil sunt seiet ensement cume porc ; aoi. E la terce est de Nubles e de Bios,

3225 E la quarte est de Bruns e d'Esclavoz, E la quinte est de Sorbres e de Sorz, E la siste est d'Ermines e de Mors, E la sedme est de cels de Jéricho, E l'oitme est de Nigres e la noefme de Gros,

3230 E la disme est de Balide la fort :

Ço est une gent ki unches ben ne volt.

Li amiralz en juret quanqu'il poet

De Mahumet les vertuz e le cors :

« Karles de France chevalchet cume fols.

3235 Bataille i ert, se il ne s'en destolt ; Jamais n'avrat el chef corone d'or. »