CHAPITRE II
Du Rut des Cerfs.
pu descrire par le menu comme il appartient, de la nature du Cerf, il faut commencer par où il se fait et crée : Comme se vient sur la my-Septembre,mesmement si les brouillars s'aduancent, les Cerfs commencent à rire apres les Biches, c'est à dire, font un cry et hurlement, qui rend tesmoignage qu’ils entrent en chaleur, ne plus ne moins que les cheuaux font à ia saison de leur monte. Ils demeurent enuiron sept ou huict iours auant que les bestes les veuillent endurer, car ils sont plustost en rut que les Biches, et à force de les suiure les y mettent; les sept ou huict jours passez, ils entrent dans le fort de leur rut, et ne demeurent en aucune place, ains ne font que cheminer et musser, c'est à dire, mettre le nez en terre, et sentent par où les Biches ont passé, et les poussent et chassent de cette manière deuant eux. Ils tiennent du
naturel des hommes, car pour l'amour ils se battent, dont il aduient souuent qu'il s’en tuë quelques vns, et sont alors si transportéz qu'ils laissent approcher les hommes d’eux, sans monstrer d'en auoir peur. Ils tiennent leur rut communément au soir, et diriez que c'est vn tournoy. Car les Biches s’assemblent à la plus belle et plus spacieuse place de la forest, et le plus souuent où il y a des mares, esquelles les Cerfs se souillent pour se rafraischir apres auoir combattu. Le plus grand Cerf est celuy qui tient le camp comme vn tenant.
Il est auec toutes ses Biches, et les tient toutes en vn troupeau, tout ainsi qu'vn Berger fait ses moutons : Si quelqu'vne s'escarte il la va chercher comme s’il en auoit la charge. Si quelqu’autre Cerf se presente pour rutter, il ne faut point de l’attaquer et assaillir de si grande furie et roideur, qu'ils se prennent et meslent bien souuent les testes si fort qu'ils ne les peuuent desfaire, et meurent ainsi.
Qu’ainsi ne soit, j'ay des testes dans mon cabinet de Fontainebleau qui sont si meslées de cette facon qu'à present elles ne peuuent encor estre deffaictes. Si durant ce combat il arriue en ladite place quelque jeune Cerf qui par crainte des plus vieux n’aye osé approcher desdites bestes, il ne laisse perdre cette
occasion : et voyant que les autres se battent et sont occupez, ne faut à jouyr de ses amours, ce quil fait comme à la desrobée. Or comme J'ay diet lesdits Cerfs commencent leur rut à la my-Septembre, et le finissent en la my-Octobre. toutesfois selon que l'Hyuer est. Car s’il aduance ils s'en retirent plustost, du contraire, s'il retarde, et que l’année soit fructueuse de glands, ils y demeurent dauantage, car le gland qui les eschauffe les y entretient : Mais quoi qu'il en soit, ils ne passent la fin d'Octobre, qu'ils n'en soient du tout hors : les ieunes Cerfs s'y tiennent huict iours apres les autres, pour ce que n'ayans la force pour resister aux plus vieux ils entrent en leur rut quand les autres en sont hors et ne leur donnent aucun empeschement.
