CHAPITRE GLX

Comment le duc Jehan de Bourgongne multiplia ses gens d'armes. Le mariage du seigneur de La Trimoille. Et l'armée que le duc de Clarence fist pour Harfleur.

Or est vérité que le duc de Bourgongne, sachant la publicacion desdiz mandemens royaulx estre grandement ou préjudice et deshonneur de lui et de ses gens, fut plus que par avant troublé et indigné contre ceulx qui gouvernoient le Roy, et pour tant de plus en plus acrut et multiplia ses gens d'armes et leur consenti à menger son propre pais , le Cambrésis , Tiérace , Vermendois, Santers et toute la terre estant dessoubz le Roy entour la rivière de Somme jusques à la mer et vers le Crotoy et Moustereul. Et pour lors justice estoit petitement gardée et soustenue en icelles parties. Les puissans, nobles et autres , traictoient cruelement les gens d'église et le povre peuple. Et quant aux prévostz, sergens et autres officiers royaulx, peu ou néant osoient exécuter leurs offices. Et au regart des marchans, Dz n'osoient mener leurs marchandises hors des bonnes villes et fortresses , si non par tribut ou sauf-conduit, ou soubz aventure de perdre corps et biens.

En ce temps la duchesse de Berry, doagère, espousa le seigneur de La ïrémoille, qui point n'estoit aymé du duc de Bourgongne. Et pour tant que icelle duchesse estoit de son héritage contesse de Boulonnois, envoya icellui duc, le seigneur de Fosseux, alors gouverneur d'Artois, en la ville de Boulongne pour icelle

saisir et mectre en sa main. Et fut ceste chose ainsi faicte. Mais en icelle demoura capitaine commis de par le Roy, le seigneur de Moreul, contre les Anglois. Item, en ces jours le duc de Clarence, frère du roy d'Angleterre, se parti du port de Sandvich, à tout trois cens vaisseaulx d'armes pleins d' Anglois , lesquelz il fist mectre et conduire au port de Harfleur en Normendie , et là par bataille forte et puissante destruisi le navire des François , qui long temps avoient esté à siège devant icelle ville par le connestable de France. Et là furent mors grant partie de ceulx qui estoient dedens ledit navire. Et après que icellui duc eust regarny de vivres et de gens icelle ville, s'en retourna en Angleterre, très joieux de sa bonne fortune.