CHAPITRE GCXX
Comment le duc Phelippe de Bourgongne mist le siège devant Crespy en Laonnois, et delà ala à Troies en Champaigne devers le Roy * .
Or est vérité que après ce que le duc Phelippe de Bourgongne eut célébré la feste de la Purificacion Nostre Dame , délaissant ilec la duchesse sa femme , s'en ala en son chastel de Bapaumes et puis à Oissy en Cambrésis, devers sa tante, la contesse de Haynnau, avecques laquelle eut parlement, et après s'en ala à Péronne. Auquel lieu vindrent devers lui la plus grant partie de ses capitaines, avecques iesquelz chevaulcha jusques à Saint-Quentin, et là séjourna certaine espace, actendant son exercite et armée. Et vindrent devers lui les ambaxadeurs d'Angleterre , en armes, jusques au nombre de cinq cens combatans, desquelz estoient les principaulx les contes de Warvich et de Kent , le seigneur de Ros, mareschal d'Angleterre, et messire Loys de Robersal , natif de Haynnau , que tous ensemble chevaulchèrent avecques ledit duc jusques à Troies en Champaigne. En oultre vindrent audit lieu de Saint-Quentin "devers ledit duc de Bourgongne les ambaxadeurs de la ville de Laon , Iesquelz avecques ceulx de la ville de Saint-Quentin requirent moult instamment ledit duc de Bourgongne qu'il voulsist asséger la ville de Crespy en Laonnois, que tenoient
1 . Dans les imprimés ce chapitre ne comprend que le siège de Crespy. Quant au voyage du duc de Bourgongne, il forme le ccxxi* chapitre.
les gens du Daulphin, qui moult gastoient et destruisoientle pays à l'eiiviron. Laquelle chose, en la faveur des dessusdiz , fut par icellui duc accordée. En après, de Saint-Quentin ala icellui duc loger à Crécy sur Sere, et envoya messire Jehan de Luxembourg , accompaigné de Hector et Phelippe de Saveuses et aucuns autres capitaines, loger en ung vilage assez près de Crespy, ainsi que par manière d'avant-garde. Et assez tost après ledit duc avecques toute son armée , dudit lieu ala asséger tout à l'environ ladicte ville de Crespy, dedens laquelle estoient bien cinq cens combatans tenans la partie du Daulphin, desquelz estoient chefz et capitaines La Hire, Poton de Saincte -Treille, Daudonnetet autres aventureux, qui tous ensemble vigoureusement et de grant courage défendirent icelle ville contre lesdiz asségans. Néantmoins furent de très près approchez, et plusieurs engins drécez contre les portes et murailles. Si estoient lors avecques ledit duc plusieurs capitaines qui tout leur temps avoient servy le duc Jehan son père. C'estassavoir messire Jehan de Luxembourg , les seigneurs de l'Isle-Adam et de Chastellus , tous deux mareschaulx de France, messire Robinet de Mailli , grant panetier de France , Le Veau de Bar , bailli d' Auxi , le vidame d'Amiens , Anthoine, seigneur de Croy, messire Phelippe de Fosseux et Jehan son frère , le seigneur de Longueval , Hector et Phelippe de Saveuses, le seigneur de Humières, qui conduisoit les gens du seigneur d'Anloing, le seigneur de Humbercourt, messire Mauroy de Saint- Liger, le seigneur d'Estienhuse, souverain de Flandres, le seigneur de Commines, le seigneur de Haluyn , le bastard de Harecourt, à tout les gens
de messire Jaques de Harecourt, son oncle, et moult d'autres nobles chevaliers et escuiers des pays dudit duc. Et estoient adonc de son plus privé conseil et ses plus féables gouverneurs, messire Athis de Brimeul et le seigneur de Roubaix, chevaliers, avec l'évesque de Tournay, son chancelier. Lequel duc, après qu'il eut fait faire grandes préparacions pour assaillir lesdiz asségez , en conclusion , au bout de quinze jours ou environ après ledit siège mis , fut traictié fait entre les parties, par condicion que lesdiz asségez s'en yroient sauf leur corps et leurs biens, en rendant la ville en la main dudit duc , pour ce que c'estoit sa première armée, réservé aucuns qui estoient des villes de l'obéissance du Roy, lesquelz demeurèrent prisonniers. Après lequel traictié se départirent les dessusdiz Daulphinois soubs le sauf conduict dudit duc de Bourgongne. Non obstant lequel, à leur département, on y eut plusieurs destroussez, dont ledit duc et ceulx de son conseil en furent très mal contens, et firent restituer ce qui en vint à leur cognoissance. Si s'en alèrent iceulx Daulphinois à Soissons, qui se tenoit de leur parti. Laquelle ville de Crespy, après le département dessusdit, fut pillée et desnuée de tous biens portatifz qui y furent trouvez , et après , par la requeste de ceulx de Laon , fut la fortificacion d'icelle ville abatue et desmolie , c'estassavoir les portes et murailles. Pour quoy, en poursuivant de mal en pis , demourèrent les habitans d'icelle en grant tristesse, et non pas sans cause. Car paravant la guerre c'estoit ville plantureuse et remplie de tous biens. Si estoit en la compaignie dudit duc de Bourgongne durant ladicte armée, qui ne fait point à oublier, ce vail-
lant chevalier duquel cy-devant est faicte mencion , nommé Tabari, à tout ses brigans, lequel en conclusion ne fist que demy -voiage et demoura en la poursuicte, vous orrez cy après.
